Vittus Qujaukitsoq Naleqqami ilaasortanngortoq
Naleraq sapaatini akunnerni kingullerni nutaanik ilaasortartaarpoq – sulilu ilaasortanngortoqartaarpoq.
Vittus Qujaukitsoq, Naleqqamut ilaasortanngorpoq.
- Naalagaaffinngornissatsinnut apeqqut aalajangiisorujussuuvoq, Vittus Qujaukitsoq oqarpoq, nangillunilu:
- Partiit siunertaat anguniakkannut tulluarnerpaatut isigisakka nalilersuiffiginikuuakka. Taamaattumik taanna uannut ajornaatsunnguuvoq aalajangerniarnera suna tunuliaqutaralugu sassarniarninni.
Vittus Qujaukitsoq Naleraq tunuliaqutaralugu Inatsisartunut sassassaaq. Tamannali tassunga nutaajunngilaq. Taannami Siumut kingusinnerusukkullu partii nammineq pilersitseqataaffigisani, Nunatta Qitornai, tunuliaqutigalugit Inatsisartunut Naalakkersuisunullu ilaasortaanikuuvoq.
Partiili pilersitseqataaffigisani maanna ima oqaasertalerpaa.
- Partii taanna oqaluttuaannanngornikuuvoq.
Partii aallartiseqqinnianngikkaa
Nunatta Qitornai Inatsisartunut 2018-imi qinersinermi ataatsimik ilaasortaatitaqalerput. Taanna tassaavoq pineqartoq, Vittus Qujaukitsoq. Kisianni 2021-imi qinersinermi inatsisiliortunut ilaasortaatitaqaannarnissaq ajornarpoq. Tamannalu ilaatigut misigeqqikkusunnginnamiuk Naleqqamut nuuppoq.
- Kingullermik immaqa qinersisoqarnerani takuneqarsinnaavoq taaguunneqaraluarluta Inatsisartunut ilaasortaatitaqalernikuunnginnatta. Taamaalilluni taasinerit atorneqanngitsoorlutik. Taamaattumik taanna killiffik killiffigeqqikkusunnagu.
Nunatta Qitornaasalu politikkimi akooqqilernissaa taassuma naatsorsuutiginngilaa.
- Partiitut taanna aallarteqqinnissaa pilersaarutiginngilara. Nutaamik parteeqalernera taanna aalajangiutereermat tassunga nukikka tamarmik atorlugit suliniarnissara aallartereerlugu.
Vittus Qujaukitsoq, KNAPK-mi pisortatut ulluinnarni atorfeqarpoq. Qineqqusaarnerup nalaani sulinngiffeqarnissani sulisitsisuminut maanna kissaatigalugu qinnutigaa. Inatsisartunulli ilaasortanngoqqissagaluaruni pisortatut atorfik soraarniuteqarfiginiarpaa.
- Marloqiusamik isumaga malillugu inissisimasoqarsinnaanngilaq. Taamaattumik uani atorfik taama pingaaruteqartigisoq naatsorsuutiginngilara Inatsisartunut isissaguma inissisimaffigiinnaassallugu, Vittus Qujaukitsoq KNR-imut oqarpoq.
