Knud Mathiassen Naleqqamut ilaasortanngortoq

Inatsisartunut ilaasortaq, attaviitsoq Knud Mathiassen Naleqqamut ilaasortanngornissaminut qinnuteqarpoq.

Knud Mathiassenip unnerluunneqarsinnaannginnera Inatsisartuni siorna apriilimi atorunnaarsinneqarpoq. Taanna Inuit Ataqatigiinni ilaasortaalluni qinigaanikuuvoq.

Unnerluunneqarsinnaannginnera atorunnaarsinneqarmat IA-mit anisinneqarpoq. Knud Mathiassen paniminut nakuusersimasutut pasineqartoq kingorna saqqummiunneqarpoq.

Politikerili Eqqartuussisoqarfik Sermersuumi aamma Nunatta Eqqartuussisuuneqarfianit - pinngitsuutinneqarpoq.

Nunatta Eqqartuussisuuneqarfiani pinngitsuutitsisoqarnerata kingornatigut Knud Mathiassenip partiimut allamut ilaasortanngornissaminut periarfissaq ammaffigalugu KNR-imut sapaatip akunnerata siuliani oqaatigaa.

Naleqqamullu ilaasortanngornissani maanna qinnutigisimagaa Naleqqap siulittaasuata Pele Brobergip tusagassiuutinut nalunaarummi ilisimatitsissutigaa:

- Qinersisoqartinnagu Naleqqap inatsisartuni maanna siullerpaamik amerlanerulersinnaanera ikinneqarmat, pingaarsimavoq partiitta iluani malitassat qulakkeerluarneqarnerat.

- Naluneqanngilaq inatsisartuni ilaasortat partiimut allamut nikissinnaanerat, Naleqqamullu pingaaruteqarpoq anguniakkagut piumassuseqarfiginissaat politikkikkut sulinermi, Pele Broberg oqarpoq.

Illuatungiliuttuni amerlanerpaasoq

Knud Mathiassenip Naleqqamut qinnuteqaammini partiip nunap inoqqaavinik kiisalu piniartunik pingaartitsilluinnartuunera piviusorsiortumillu politikkeqarnera tunngavilersuutigai.

Knud Mathiassenip Naleqqamut ilaasortanngornissamut qinnuteqaataa partiip immikkoortortaqarfiata tigoqqaarsimagaa Pele Brobergip ilisimatitsissutigaa. Partiip siulersuisuunerisa Knud Mathiassenip qinnuteqaataa kingorna isummerfigisimavaat.

Attaviitsullu ilaasortanngorsinnaanissaa siulersuisuunerit akuersissutigalugu.

Naleraq inatsisartuni taamaasilluni tallimanik maanna ilaasortaatitaqalerpoq - tassa partiit illuatungiliuttut Demokraatit Atassullu ilaasortaatitaasa ataatsimut amerlaqataannik Naleraq inatsisartuni ilaasortaatitaqalerluni.

- Naleqqap pilersinneqarneraniit inatsisartuni ilaasortat aatsaat taama amerlatigilernerat, aamma qinersinerup tulliata kingorna siunniuteqarnissatta annertusiartornissaa neriuuteqarfigaarput, Pele Broberg oqarpoq.

Knud Mathiassen Inatsisartunut 2021-mi qinersinermi 60-init taaguunneqarpoq, sinniisutulli iserluni.