El Niño pissutaalluni nunarsuarmi ataatsimut isigalugu maajimi pisarnermit kiannerulersinnaasoq
Qaammatini tulliuttuni El Niñoqalersinnaasoq ilimagineqarpoq, taamaalinerani nunarsuaq tamakkerlugu pisarnermit kiannerulersinnaassalluni, nunarsuarmilu sumiiffinni assigiinngitsuni sialoqartarnera allanngorsinnaassalluni.
Nunarsuaq tamakkerlugu silasiornermik suliniaqatigiiffik WMO tusagassiutinut nalunaarummi taama allappoq:
- Silap pissusia ukiup aallartinneraniilli aalaakkaasimariarluni El Niñoqalernissaatut isikkoqaleriartuinnartoq isumaqatigiissutigineqarpoq, Wilfran Moufouma Okia, WMO sinnerlugu silap pissusianik malinnaasut aqutsisuat oqarpoq.
El Niño tassaavoq Manerassuup qiterpasissuani Amerika Kujalliup avataani immap pisarnermit kissatsikkiartornera.
Manerassuup ilaani immap kissatsikkiartornera pissutaalluni nunarsuup ilarujussuani silap pissusianut sunniuteqarsinnaavoq, ataatsimut isigalugu nunarsuaq kiannerulertarluni.
El Niño uteqqilerpoq
Immat sukkasuumik kissatsikkiartornerisa takutippaat El Niñoqaleriartulerunartoq, WMO mianersoqqusivoq.
El Niñop nunarsuarmi sumiiffinni assigiinngitsuni maajimit juulimut sunniuteqalereersinnaanissaa naatsorsuutigineqarpoq. El Niño nunuarsuarmi silap pissusianut qaammatini qulingiluaniit aqqaneq-marlunnut sunniuteqalereertarpoq.
Nunarsuarmi sumiiffinni amerlasuuni pisarnermit kiannerunissaa, silap pissusianik malinnaasunit WMO-mit ilimagineqarpoq.
Sumiiffinni assigiinngitsuni siallertarnera allannguuteqarsinnaasoq aamma eqqoriarneqarpoq.
Ukiut marluk arfineq-marlullu ingerlaneranni El Niñoqakkajuppoq.
Naak El Niñoqartarnera allanngorartaraluartoq, Amerika Kujalliup kujasissortaani, Afrikap kujasissortaani Asiallu qiterpasissortaani siallernerusalersartoq nalilerneqarpoq.
El Niñoqaraangat assersuutigalugu Australiami, Indonesiami Asiallu kujasissortaani panernersuaqartar.
Kingullermik El Niñoqarmat 2023-mi pivoq, 2024-llu tungaanut taamanikkut sivisussuseqarluni. Inuit pilersitaannik silap pissusia allanngoriartortoq, maanna El Niñoqalernera nunarsuarmi ataatsimut isigalugu 2024-mi aatsaat taama kiatsigineranik malitseqartoq oqaatigineqarpoq.
El Niño spanskisut isumaqarpoq "Nukappiaraq", Jesusip erneranut tikkuussilluni, El Niñomi pissutaalluni immat decembarimi kissatsikkiartornerusarmata.
/Ritzau/
