Isikkamik arsaanneq: Savalimmiuliarneq arlalinnik siunertalik

Arnat amerlanerusut silami arsaannermik soqutigisaqalersinniarlugit pilerinarsaasoqarpoq.

Taakku ilagaat aggustimi Savalimmiuliarnissaq tassanilu Savalimmiormiut U-19-ini nunanut allanut unammisartui unammineqassapput. Angalanissaq avammut nalunaarutigineqarpoq illup iluani arsaannermi futsalimi arnat pissartanngorniunnerat naammasseqqajaalersoq.

- Maanna pisussat tassaapput arnat niviarsiaqqallu Kalaallit Nunaanni arsaattarnerisa pingaartinneqarnerulernissaannik suliniutip ilai. Assorujussuaq pingaaruteqarpoq Kalaallit Nunaanni niviarsiaqqat nuannaartorisaqarnissaat. Arnani nunanut allanut unammisartuni tamanna aallartilluareerparput taanna nuannaartorisaqalersitsiniarnermi pingaaruteqarmat, silami arsaannermi arnat nuna tamakkerlugu sungiusaasuat Danny Jung KNR-imut oqarpoq.

Silami arsaannermi nunanut allanut unammisartut ukiorpassuarni katersuutsinneqarsimanatik siorna katersuutsinneqaqqipput. B93 sungiusaammik unammivaat siullermik ajorsarfigereerlugu tullianik unamminermi ajugaaffigalugu.

Savalimmiormiut U-19-ini nunanut allanut unammisartut qallunaallu iligiit ataatsit maanna unammissavaat. Naak ‘taamaallaat’ Savalimmiormiut U-19-iugaluartut nuna tamakkerlugu sungiusaasup qularinngivippaa Savalimmiuni unammisassatik sakkortussaqisut.

Pikkunassaaq

- Uatsinnut tamanna pikkunartussaavoq, kisianni aamma misilittakkatigut katersiffiulluassaaq. Aamma pitsaavoq iligiinnut allarluinnarnut allaanerusumik arsariaasilinnut silamilu arsaannermik sungiussisimalluartunut unamminissaq, Danny Jung oqarpoq.

- Angalaqatigiilluni ataatsimoornerup Kalaallit Nunaallu sinnerlugu sassarnerup saniatigut misilittakkanik arsaannermi pissarsiaqassaqaagut. Assut pissanganarpoq, Danny Jung oqarpoq.

KNR-mi saqqummiunneqareersutut arsaattartut kattuffiat KAK suliniuteqarpoq silami arsaaffiit qulisanngortinnissaannik. Taamaasilluni silami arsaannermi sungiusarneq unammisarnerlu sivitsorniarniarneqarput. Qulisat pullattakkanik sinaakkutillit eqqarsaataapput.

Silami arsaattartuni inerisaanermut tamanna tulluuppoq.

- Kalaallit Nunaanni airdomesit pilersinnissaat eqqarsaatigalugu suliniut aallartittoq pingaaruteqarluinnarpoq arsaattarnerup siammarternissaanut ukioq kaajallallugu arsaattoqartalerniassammat niviarsiaqqallu amerlanerusut arsaattalernissaannut. Taamaattumik suliniutip aallartinnera assut nuannaarutigaara, Danny Jung oqarpoq.

KAK paasisassarsiorluni ukioq Finlandimiippoq namminersorlutik oqartussat aamma kommunit sinniisaat peqatigalugit tassanilu airdomes angissutsinni assigiinngitsuniittut takuniarneqarput.

Arnat futsalimi unammersuarnerat eqqaaneqatsiartoq sapaammi inissinniuttoqalerpat naammassissaaq. Unamminerit KNR-TV-imi isiginnaarneqarsinnaapput.