Politiit ullormut nalunaarutaat: Umiatsiat sisamat Nuup Kangerluani sikoqangaatsiarnerani kiggigussaasut
Nuup Kangerluani sikoqangaatsiarpoq, umiatsiallu sisamat ippassaq ataasinngornermi ajornartoorlutik. Kalaallit Nunaanni Politiit pigaartuisa pisortaat Jørgen Madsen marlunngornermi ullaakkut taama oqarpoq.
- Politiit angallataat Sisak orniguppoq umiatsiallu kiggigussaasimasut aqqutissiuullugit, Jørgen Madsen oqarpoq.
Umiatsiat sisamat akornanni pingasut ikiorneqarput. Umiatsiami kingullermi issimasut nunamut qanittumiimmata sikumut qaqisinnaasimasut, politiit pigaartuisa pisortaat oqarpoq.
- Inuit angalaniaraangamik mianersortarnissaat kaammattuutigerusupparput, annaassiniarnermut atortunik peqarnissaat kaammattuutigaarput, pisariaqassappat attaveqarfigisinnaaniassagatsigit, Jørgen Madsen oqarpoq.
Sisak umiatsianut pineqartunut ippassaq aqqutissiuivoq, tamarmillu ajunngitsumik inerneqarput. Umiatsiat kiggigussaanerminni ajoqusersimanersut politiit ilisimanngikkaat, politiit pigaartuisa pisortaata oqaatigaa.
