Knud Mathiassen IA-mit ilaasortaajunnaarsinneqarpoq

Inuit Ataqatigiit siulersuisuunerisa Knud Mathiassen partiimut ilaasortaajunnaarsippaat.

Knud Mathiassenip unnerluunneqarsinnaannginnerata atorunnaarsinneqarnerata kingunitsianngua taanna ilaasortaajunnaarsinneqarluni.

Suna suullu pissutigalugit unnerluunneqarnini Knud Mathiassenip oqaatigerusunngilaa. Taamaattorli facebookimini sapaatip akunnerani kingullermi ima allalluni:

- Tassa uanga uani pineqarpunga eqqartuussaasinnaannginnera atorunnaarsinneqartussaavoq - aap ilumoorpoq eqqartuussaasussaavunga kisianni unnerluussutit ilumoortuunngillat. Katsorsartinnera peqqutigalugu maanna sulinngiffeqarpunga - katsorsartinninnili oqaaseqarusunngilanga. Suliartoruma Tusass.

IA siulersuisuunerisa ilaasortaajunnaarsitsinertik oqaaseqarfigerusunnagu tusagassiutinut nalunaarummi ima allapput:

- Inuit Ataqatigiit naalakkersuinikkut sulinerminni sunniuteqarnissartik inuiaqatigiinnilu naapertuilluartumik iliuuseqarnissaq pingaartitaraat. Partiitta iluani qinikkat tamarmik pisussaaffeqarlutillu akisussaaffeqarput. Siulersuisuunernilu naliliinitsinni taakkua isiginiarsivagut.

Inatsisartunilu politikerip inatsisinik unioqqutitsisimasutut pasineqarnera pissutigalugu unnerluunneqarsinnaannginnera atorunnaarsinneqarpoq.

Taamaattoqartillugulu Inatsisartuni ilaasortaqatai eqqartuussivilersuunneqarsinnaanissaanut akuersisussaapput. Inatsisartunummi qinikkat unnerluutigineqarsinnaanngitsut, tunngaviusumik inatsimmi allaqqavoq. Unnerluutigineqarsinnaannginnerallu atorunnaarsinneqarnissaat Inatsisartuni taasissutigineqaqqaartussaavoq.

Knud Mathiassenip Inuit Ataqatigiillu oqaaseqartinneqarnissaat KNR-imit sulissutigineqarpoq.