Peqqissaasoq: - Sooruna peqqinnissaqarfitsinni sulinissaq nunaqavissunut pilerinarsarsinnaanngikkipput?

Nunatsinni peqqinnissaqarfinni peqqissaasunik amigaateqartoqarnera pissutigalugu, peqqissaasut Danmarkimit tikillutik suliartortussat 30-t, aningaasarsiami saniatigut bonusinnattalernissaat, angalanerminni ineqarnerminnilu aamma akiliunneqarnissaat isumaqatigiissutigineqarpoq.

Taamalu aaqqiisoqarnera Dronning Ingridip napparsimmavissuani peqqissaasup Paninnguaq Boassenip apeqquserpaa:

- Uanga aana apeqqusertagara kalaallit peqqissaasut amerlanerpaat peqqinnissaqarfimmi sulinngillat. Danmarkiminngaanniit vikarit peqqinnissaqarfitsinnut suliartornissaat pilerinarsarsinnaagutsigu sooruna peqqinnissaqarfitsinni sulinissaq nunaqavissunut pilerinarsarsinnaanngikkipput?, taanna oqarpoq.

Dansk Sygeplejeråd Danmarkimilu qitiusumik nunap immikkoortui danskinut nunatsinnut suliartortunut atugassaritinneqartussat pillugit isumaqatigiissuteqartuupput.

Taamalu isumaqatigiissuteqarnermi nunatsinnut suliartornissaq aatsaat pilerinarnerulertoq, Dansk Sygeplejerådimi siulittaasup Dorthe Doe Danbjørgip tusagassiuutinut nalunaarummi oqaatigaa.

- Maannakkut aallarnissaq pilerinarnerulerpoq, taanna oqarpoq

Nuaqavissunut pilerinarsaasoqartariaqaraluartoq

Danmarkimit nunatsinnut suliartorallartartut 100-t 140-llu akornaniittut Peqqinnissaq Pillugu Kattuffimmi siulittaasup Navarana Johansenip ilisimatitsissutigaa. Nunatsinnilu peqqissaasut ilinniarsimasut arlallit peqqinnissaqarfimmi sulinngitsut Paninnguaq Boassenip oqaatigaa.

Taamaammallu avataanit tikisitsiinnarani nunatsinni atugassarititaasunik pitsanngorsaasoqarnissaa pisariaqartoq taanna oqarpoq.

- Isumaqarpunga eqqumaffigineqarnerusuuppat peqqissaasut amerlasoorujussuit peqqinnissaqarfimmi sulinngitsut, taakkununngalu pilerinarsaasoqarluni sulilertut amerlanerulerpata peqqinnissaqarfik tamaat isigalugu ajunnginnerujuussagaluarpoq, Paninnguaq Boassen oqarpoq.

Isumaqatigiissut atuutilerpat peqqissaasut Danmarkimiit suliartortut nunatsinni peqqissaasunit aningaasarsiaqarnerunissaat naligiinngitsitsilertussaavoq. Nikingasoqalertussaaneralu inissaminiinngitsoq taanna isumaqarpoq.

- Uagut suliakkerneqartut soorlu suliatta saniatigut suliaqarnerit, nutserinerit, assigiinngitsut suliassat, oqaloqateqarnerit nassuiaanerit taakku eqqarsaatigalugit peqqinnissaqarfimmi sulisuulluni akisussaaffiit amerlasoorujussuupput. Taamaammat taanna inissaminiinngilaq taamatut akissarsiat vikarininngaanniit annikinnerunissaat.

Ajornartorsiutinik iluarsiipallannerit unitsinneqartariaqartut

Nunatsinni peqqinnissaqarfinni peqqissaasunik nakorsanillu amigaateqarneq pissutigalugu Danmarkimit tikillutik suliartorallartartut amerlineqarnissaat, Nunatsinni Peqqinnissaqarfimmit Danmarkimilu nunap qitiusumik immikkoortuinit maajimi isumaqatigiissutigineqarpoq.

- Taanna aamma qasunarpoq peqqinnissaqarfimmi sulilluni, soorlu uungaaraannaq isigineq sukkasuumik ukua qaangiutsipallatsigit, uani isiginiartussaanerugunaraluarpagut qanoruna ililluta peqqinnissaqarfimmi sulisut ataavartumik paarissagivut?

Naak Paninnguaq Boassen ukiuni arfineq marlunni peqqinnissaqarfimmi sulereeraluarluni maanna pissutsit taamaatsillugit suliinnarnissani takorlooruminaatsippaa:

- Peqqissaasunngornikuuvunga tamanna siunertaralugu peqqinnissaqarfimmi sulerusullunga maani Kalaallit Nunaanni. Kisianni atugassarititaasut, aningaasarsiat assigiinngitsullu pissutaallutik massakkut takorlooruminaatsittorujussuuara Kalaallit Nunaata peqqinnissaqarfiani suliinnarnissara, taanna oqarpoq.

Kalaallillu peqqissaasut atugassarititaasa pitsanngorsarneqarnissaat Paninnguaq Boassenip kissaatigaa:

- Kissaatigigaluarpara nunaqavissut peqqinnissaqarfimmi sulerusuttut qitiutinneqarnissaat, Paninnguaq Boassen oqarpoq.

Danmarkimi nunap qitiusumik immikkoortuinit Dansk Sygeplejerådimiillu isumaqatigiissutigineqartoq 2029-ip naaneranut atuuttussaavoq.