KNQK: Qimussertarneq attatiinnarusupparput

Uummannami Avannaata Qimussersuaqalerpat qimmit Ilulissaneersut maanna peqataasinnaajunnaarput.

Uummannami Avannaata Qimussersuaqalerpat qimmit Ilulissaneersut maanna peqataasinnaajunnaarput. 

Ilulissani qimmit akornanni nappaalasoqarnerata aarleqqutigineqarnerata kingorna tamanna pivoq. 

Qimmit Qeqertameersut peqataaqqusaajunnaareerput, Avannaatalu Qimussersuanik aaqqissuisut qimmit akiuussutissamik kapineqarsimasut kisiisa peqataasinnaanerat naqissuserpaat.

- Kikkulluunniit nappaalasoortut qimminik nappaalasoorfiusuninngaanniit Avannaata Qimussersuanut akuliutsinneqarnavianngillat. Piumasaqaat tamanna Iluliarmiunut aamma atuuppoq, Kalaallit Nunaanni Qimussertartut Kattuffianni siulittaasoq, Mikkel Jeremiassen KNR-imut oqarpoq.

Aamma atuaruk Qimmit nappaataat Ilulissani tuniluutilertorpasittoq

Aamma atuaruk Qimmit nappaataata Ilulissanut anngussimanissaa aarleqqutigineqartoq

Akiuussutissat

Taamaammat qimmitillit Avannaata Qimussersuanut peqataassagunik qimmimik akiuussutissamik kapitissimanerannut uppernarsaateqartariaqarput.

 - Aamma uagut kattuffimmit qimussernermik illersuillutalu tammatsaaliuisuunitsinni nappaammik siaruartiterisinnaasumik aqqutissiuuffiginavianngilluinnarpagut, siulittaasoq aamma oqarpoq.

Qimmip nappaatanik kingunerluutinik naammattuuisimasut ilagaat Kaj Adam Jensen, taassumalu qimmiminit 17-init sisamat toqutsittariaqarsimavai. 

Pissutsillu pimoorunneqanngitsut Kaj Adam Jensen isumaqarpoq.

- Pingaarutilittut annertuutut ulorianartutullu tiguneqarpasinnginnami. Ilulissanut maanna anngussimarpasippoq, illoqarfinnullu allanut siaruarniaruni qimmit tunillanneqartut amerlasoorujussuussapput, Kaj Adam Jensen oqarpoq.

Aamma atuaruk Qeqertami qimmit 70-it toqunneqartariaqartut

Nappaatip ersiutai

Qimmit nererusussuseqannginnerat, kissarneqarnerat, meriartarnerat, naarlunnerat isaanniillu qingaanniillu qorsorpaluttumik aniasoqarnera nappaataannut ersiutissaapput.

Perlerornermut akiuussutissamut sanilliullugu qimmit nappaataannut akiuussutissamut kapitinnissaq piumasaqaataanngilaq, taamaattariaqartorli Mikkel Jeremiassen isumaqarpoq.

 - Qimussit kattuffiannit isumaqarpugut pisussaaffiusariaqartoq aammalu pituttuiffiusumik qimminut nappaatinut sunulluunniit akiuussutissalersuinerit pisussaaffiussasut. Taamaaligutta aatsaat kapuutinik nunguttoortarnerit allallu aatsaat anigorsinnaagatsigit, Kalaallit Nunaanni Qimussertartut Kattuffianni siulittaasoq, Mikkel Jeremiassen, oqarpoq.

Mikkel Jeremiassenip aalisarnermut, piniarnermut nunalerinermullu naalakkersuisoq Karl-Kristian Kruse Avannaata Qimussersuata Uummannami ingerlanneqarnerani ataatsimeeqatigissavaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat