KNI Nunatta karsianut 125 millioninik tunniussisoq

KNI-p sinneqartoorutini ukiut arfinillit ingerlanerini marloriaatinngortissimavai. Ukiumi naatsorsuuteqarfiusumi matumani 100 millionit koruuninik sinneqartoorpoq.
Allattoq Mads Pedersen
juunip 28-at 2017 09:16

KNI ukiumi naatsorsuuteqarfiusumi 2016/17-imi akileraarutit ilanngaatigineqannginnerini 103 millionit koruuninik sinneqartoorpoq, ukiup siuliani 101,2 millionit koruuninik sinneqartoorluni.
Angusaq kusanartuusoq KNI-p oqariartuutigaa. 

Suliffeqarfissuaq ukiumi naatsorsuuteqarfiusumi 2011-imi 12-imilu 53,1 millionit koruuninik isertitaqarsimavoq. Tamannalu isumaqarpoq KNI-p ukiuni arfinilinni sinneqartoorutini marloriaatingajanngortissimagai. 

Ukioq manna naatsorsuuteqarfiusoq Nunatta karsiata pissarsiaqaatigissavaa. Tassa Namminersorlutik Oqartussat, suliffeqarfissuarmi piginnittuusut, KNI-lu isumaqatigiinnikkut 20 millionit koruuninik pissarsissammat. 

Taakku saniatigut KNI-mi sulisut akileraarnerisigut Nunatta karsia 80 millionit koruuninik pissarsivoq, suliffeqarfissuullu akileraarneratigut 25 millionit koruuninik pissarsilluni. 

Tamanna isumaqarpoq Nunatta karsia katillugit 125 millionit koruuninik KNI-imit pissarsisoq. 

Naatsorsuuteqarfiusumi matumani KNI-mi atorfinnut 760-nut sulisut, 934-t sulisorineqarsimapput.

 

 

 

 

 

 

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk