Polar Seafoodip sinneqartoorutini saqqummiukkai
Kalaallit aalisartitseqatigiiffissuata Polar Seafoodip 2016-imut naatsorsuutini saqqummiuppai, taakkualu tatutippaat amerlasoorsuarnik sinneqartooqqittoq.
Sinneqartoorutit 266 millionit koruuniupput, taakkuali 2015-imi sinneqartoorutinit 68 millionit koruuninik ikinnerupput. Ikileriaat piginneqatigiiffik naapertorlugu raajat akiisa apparnerannik peqquteqarpoq.
Polar Seafoodip siulersuisuisa siulittaasua, Henrik Leth, angusanut naammagisimaarinnippoq:
- Niuerfiit allanngorartuartillugit sukkasuumik naleqqussaapallassinnaalluta pitsaasunik tunisassiorluta iluatsitsilluarsinnaanerput uppernarsarparput, Henrik Leth piginneqatigiiffiup tusagassiutinut nalunaarutaani oqarpoq
Siulersuisut siulittaasuat: Naalakkersuisut aarlerititsipput
Taassumali Naalakkersuisut maanna nalunaarutigisartagaat naammagisimaanngilai:
- Ingammik raajanik aalisakkanillu pisassiissuteqartarnermi allannguuteqarnissamik Naalakkersuisut aarlerisaarinerat, siunissami aningaasaliissuteqarniarnermi nalornisoortitsivoq. Taamaammat piffissaatillugu silatusaartariaqarpugut, siunissamilu pisassiissuteqartarnermut atatillugu pissutsit qulakkeernissaat tikillugu, Kalaallit Nunaanni aningaasaliissutissat annertuut aalajangerneqareersut unitsinneqarallartariaqarlutik, Henrik Leth oqarpoq.
Taamaammat Polar Seafoodimi ataatsimeersuartut aalajangerput piginneqataassutilinnut agguagarsiiniaratik, aningaasalli suliffeqarfimmiitiinnarniarlugit.
