Air Greenland sinneqartooruteqangaatsiartoq
Kaaviiaartitat sinneqartoorutillu qaffapput. Air Greenlandip ukiumoortumik naatsorsuutaata kalaallit timersartuutileqatigiiffiat ingerlalluartoq takutippaa.
Air Greenlandip ukioq 2016 kaaviiaartitai 1.3 millionit koruuniupput tassalu 2015-imut sanilliullugu 82 millionit koruuninik qaffariarnerulluni.
Sinneqartoortutillu aamma taamaapput. Timmisartuutileqatigiiffik akileraannginnermi 111 millionit koruuninik sinneqartooruteqarpoq ukiullu siulianut sanilliullugu 20 millionit koruuninik qaffasinnerulluni.
AAMMA ATUARUK Royal Arctic Line aatsaat taama sinneqartoortigisoq
Illuatungaanili Air Greenlandip timmisartup Airbus 330-200-up tuniniassagaanni nalinga apparmat timmisartup nalinga 70 millionit koruuninik akikinnerulersippaa. Taamaasillunilu timmisartup akikillinera kiseqataasikkaanni ukioq manna angusat akileraartinnani 40 millionit koruuniullutik.
Periusissatut pilersaarusiaq ingerlalluartoq
Air Greenlandilli siulersuisuini siulittaasuata Søren Lennert Mortensenip nuannaarneranut tamanna annikinnerulersitsinngilaq:
- Ukioq 2016 ataatsimut isigalugu ajunngitsutut isigaara. Ukioq taanna angusat sulisut amerlassusaat nikitinnagit angusaapput, ulapaarfiusimaqaarlu, periusissatullu pilersaarutitta pissusissamisoortumik ingerlannera nuannaarutigaarput, Søren Lennert Mortensen allappoq
AAMMA ATUARUK Ukiup qiteqqunnerani naatsorsuutini sinneqartooruteqarneruvugut
Ukioq kingulleq Air Greenland assigiinngitsunik angusarissaarpoq. Suliffeqarfik aggustimi 2015-imut sanilliullugu 16 procentimik amerlanerusunik ilaasoqarpoq. 2016-ilu tamaat ilaasut 9 procentimik amerlanerullutik.
- Taamaammat ukioq 2016 ingerlatsivimmut ulapaarfioqaaq, amerlasuullu immikkut ittumik suliniuteqarsimapput tamakkulu inerneri naatsorsuutitsinni ersarissumik takuneqarsinnaapput, Søren Lennert Mortensen allappoq.
