Royal Arctic Line aatsaat taama sinneqartoortigisoq

2016-imi akileraartinnani sinneqartoorutit 143 millionit koruuniupput. Ukiup siulianut sanilliullu 52 millionit koruuninik amerlanerullutik.

Umiarsuuaatileqatigiiffik naapertorlugu assartugassat amerlisimaneri aningaasartuutaasartullu annikillisimaneri ingerlatseriaatsimilu pitsannguisoqarsimanera sinneqartooruteqarnermut ilaatigut peqqutaapput.

AAMMA ATUARUK Malik Arctica RAL-ip tigugaa

RAL-ip umiarsuaatissaanik ukioq kingulleq sanaartortitsinera ilungersunarsimavoq, RAL-illu umiarsuit marluk ukiaq inniminnersimasaagaluani taamaatiinnarpai. Sanaartugassalli pilersaarutigineqartut Polenimi sanaartortarfimmiit tunniunneqareersimalerput. 

2017-imi suliassat 2016-imut assingussasut Royal Arctic Linep naatsorsuutigaa. Nunatsinnulli assartuisukinnerunissaa kujammullu assartuisoqarnerunissaa naatsorsuutigineqartoq, suliffeqarfik allappoq.

2017-imut inernissat 2016-imi angusanit annikinnerunissaat naatsorsuutigineqarpoq. Umiarsuarnik nutaanik pisinerit Nuummilu nutaamik talittarfittaarneq tamatunnga ilaatigut peqqutaasoq, suliffeqarfik allappoq.

AAMMA ATUARUK Ernumassuteqarnerit niuernermik taamaatitsiinnartitsisut