KNAPK immap naqqani saliinissamut ikiorneqartoq
Upernaviup Uummannallu imartaata eqqaani saliisoqassaaq. KNAPK-p immikkoortortaqarfii saliinermik suliaqartuussapput. Taakkuli suliaqarnissamut ikiorneqarput.
Suliffeqarfik Qalut Vónin saliisoqarnissaanut atortorissaarutinut aningaasaliiniarluni aalajangerpoq. Saviit allunaasallu ilaatigut pineqarput.
Ajunngitsuliorneq KNAPK-p siulittaasuata Nikkulaat Jeremiassenip nuannaarutigaa. Taanna tusagassiuutinut nalunaarummi ima oqarpoq:
- Nuannerpoq Qalut Vónin Upernavimmi Uummannamilu aalisartunut piniartunullu iluaqutaasumik suliniummut aningaasalersueqataalluni akisussaaffimmik tiguseqataammat, tassami KNAPK-p immikkoortortaqarfii oktobarimi 2024-mi immap naqqani saliinissamik pilersaaruteqarput.
Tamarmik akisussaaffigigaat
Nunattami imartaani tamarmi aalisarnermut atortut annaaneqarsimasut amerlaqaat.
Tamannalu ajornartorsiuteqartitsivoq. Aalisartunut piniartunullu annertuallaanngitsumik. Kisianni aalisakkanut, imaani avatangiisinut minnerunngitsumillu imaani uumassusilinnut annertuumik ajornartorsiortitsivoq.
Taamaammat KNAPK imaani saliinissaq akisussaaffimmik tigusisoq, Nikkulaat Jeremiassen oqarpoq:
- Pingaaruteqarpoq sapinngisamik amerlasuut akisussaaffik tiguseqataanissaat, taamaattumik KNAPK-miit nuannaarutigivarput Qalut Vónin kattuffiup imaani avatangiisinik saligaatsuutitsinissamik suliniuteqarneranut aningaasatigut tapiissuteqarmat, taakkumi aalisagaqassutsimut uumasoqassusianullu illersuinermik annertusaaqataassammata.
Aalisarnerup siunissaa pillugu
KNAPK-p immikkoortortaqarfii immap naqqani ukiumoortumik saliisarput. Ukiunilu arlalinni Ilulissani Nuummilu saliisimallutik.
Upernavik Uummannarlu suliassamut aamma ilanngunneqalerpoq, tamaanilu aalisartut aalisarnermut atortunik annaaneqarsimasunik saliissallutik.
Taamaammat Qalut Vóninimit Hans Pavia Brandtip KNAPK-p suleqatiginissaa qilanaaraa:
- Qalut Vónin immap naqqanik saligaatsuutitsinissamik suliniummut tapersersuivoq, isumaqaratta aalisarnermik suliaqartut suliffeqarfiit tamarmik attuumassuteqartut imaata minguitsuunissaanut aalisagaqassutsimullu qulakkeerinninniarnermi akisussaaffimmik tiguseqataasariaqartut, taanna oqarpoq.
