Aningaasat millionilikkuutaat nunatta sineriaata nunap assiliornissaanut Danmarkimit immikkoortinneqartut
Immap naqqaniipput.
Aalisartut misilittagartuut kisiisa nalugunanngilaat, ikkarlikkaannilu kingunipiloqarsinnaalluni.
Ikkarluimmi amerlasuut pisortatigoortumik ilaatigut nalunaarsorneqarsimanngillat, killilimmilluunniit nalunaarsorneqarsimallutik.
Sinerissamummi qanittumi ikkarliit matumani pineqarput.
Kiatsikkiartornerata malitsigisaanik ikkarluit nalunaarsorneqarsimanngitsut amerlissapput
Atlantikullu avannaanut aningaasaliissutit aqqutigalugit aningaasat 4,4 millionit koruunit 2023-mut aningaasanut inatsimmi immikkoortinneqarput, nunap assiliornissamut taakku atorneqassallutik. Geodatastyrelsip tusagassiorfinnut nalunaarutaani tamanna atuarneqarsinnaavoq.
Nunattami sineriaata assiliornissaa ikkarluillu nalunaarsorneqarnissaat Geodatastyrelsip sulissutiginialerpaa.
Imartammi silap kiatsikkiartornerata kingunerisaanik sikuerukkiartornerisa ilutigisaanik angallavigineqaleraluttuinnartut Geodatastyrelsip tusagassiorfinnut nalunaarutaani allassimavoq.
Immakkut angallannermi paasissutissat amerlanerusut nunatsinni atorfissaqartinneqarnerulissapput.
- Kalaallit Nunaata sinerissamut qanittuata nunap assiliornissaa pingaaruteqarluinnarpoq, Kalaallit Nunaannilu suleqativut peqatigalugit qaammataasat nalunaarsuinermi atorsinnaalissagatsigit Geodatasyrelsimit nuannaarutigaara, Geodatastyrelsip pisortaa Pia Dahl Højgaard oqarpoq.
Ikkarliit tamakkerlugit nalunaarsorneqarsinnaassagunanngillat
Aningaasanut inatsimmi aningaasaliisoqarnerata kingunerisaanik Kalaallit Nunaanni amerlanerusunik sukkanerusumillu immap assiliortoqarnissaa qulakkiivinneqarsinnaanngilaq, qaammataasammi ikkarliit tamakkerlugit nalunaarsorsinnaanngikkaat Geodatastyrelsip tusagassiorfinnut nalunaarummi allaaseraa. Qaammataasat immap assingi taamaammat taarsersinnaanngilaat.
Sinerissalli qanittuani immap assinginik pilersitsisoqarneratigut tamaani angallannissamut pilersaarusiortoqarsinnaanerusoqalissaaq, upalungaarsimaniarnerlu pitsaanerulissalluni, assersuutigalugulu piniartunut, aalisartunut immakkullu angallattunut allanut sinerissap qanittuani angallanneq isumannaannerulissalluni.
Immap assinginik pilersitsineq qaammataasa atorlugit naammassineqassasoq Geodatastyrelsip ilisimatitsissutigaa.
