- Taanna isumaqatigilluinnarpara.

Kujataani takornarialerinermk ukiorpassuarni suliaqarfiusumik Greenland Sagalandimik piginnittoq Pitsi Høegh nangaarianngivilluni taama oqarpoq.

Taanna tassa takornariartitsinermut inatsissatut siunnersuut pillugu taama oqarpoq. Nunaqavissummi nunatta karsianut akileraartartuusut nunatsinni takornariartitsivinni piginneqataassuteqarsinnaanerulernissaat, inatsisissatut siunnersuummi siunniussaavoq.

Nunatsinnili takornariartitsiviit nunanut allanut attuumassutiliusut ilaasa inatsisissatut siunnersuut akerleraat. Inatsisissatut siunnersuut nunatsinni takornariartitsinermi inerisaanissamut kigaaqutaasinnaanissaa aningaasarsiornermik immikkut ilisimasallit politikerertatsinnut aamma aarlerisaarutigaat. Taamaakkaluartoq Inatsisartuni ilaasortat ernumanngillat.

Nunaqavissummi takornariartitsinermi inerisaanissamut akisussaaffik tigummisariaqaraat, Inatsisartut isumaqarput.

Nunatsinni takornarialerisut oqaloqatigisatta isumaqataanerat tupaallaatissaavallaarunanngilaq. Takornarialerisummi nunaqavissut tikkuinnarlutik isiginnaartuuinnartariaqarnerannik kinguneqakkajuttumik takornarialerisut avataaneersut initoorujussuusartut, Pitsi Høegh oqarpoq.

Inatsisissatullu siunnersuut akuerineqassappat, pissutsit allanngornerannik kinguneqarataannaavoq.

- Nunaqavissut nunatsinni takornariartitsinermi soorunami inerisaasuussapput, taanna oqarpoq.

Jan Cortsen isumaqataavoq. Taanna takornariartitsivimmik Ilulissat Local Guidemik piginnittuuvoq.

- Isumaqataanaqaaq. Apeqqutaanngilaq maani inunngorsimaguit inunngorsimanngikkaluarit, apeqqutaaginnarpoq nunatsinni inerisaaqataarusuttuusutit najugaqartuullutillu nunatsinni. Aningaasat maaniilertariaqarput illoqarfigisatsinni tamatsinni malunniutaasumik ineriartuutaasinnaasunik, taanna oqarpoq.

Pitsi Høeghip takornariartitsinermut inatsisissatut siunnersuut taperserpaa, nunatsinnili takornariartitsinermi inerisaaqataanissamut aningaasaleerusussusillit avataaneersut aamma tikilluaqquai. Assi © : Pitsi Høegh

Kunisseqqaarneq

Takornariartitsinermut inatsissasut siunnersuut nunatsinni takornarialerisut qiimmatsaatigeqisaat, kingunerisinnaasai Grønlandsbankip Sulisitsisullu aarleqqutigaat.

Nunaqavissummi nunatsinni takornariartitsinermut aningaasaleerusussusillit ikippallaartut isumaqarput.

Taamaammat nunaqavissut nunatsinni takornariartitsivinni piginneqataassuteqarsinnaanerulernissaasa inatsisissatut siunnersuummi siunniussaanera avataaneersut nunatsinni takornariartitsinermi inerisaaqataanissamut aningaasaleerusussuseqarnissaannut akornutaassasoraat.

- Avataaniit aningaasaliisoqanngippat takornarialerisullu nunaqavissunik suleqateqanngippata aamma aningaasat ilisimasallu nunanit allaneersut pinngippata, pisarialimmik ineriartortitsinissaq tamakkiisumik pinngitsuussaaq, Grønlandsbanken tusarniaanermi akissummini allappoq.

Kalaallininngaanniit aningaasaliisussaaleqinartarsimasoq kalaallilli takornarialerisunngornissamik kajumittut ukiuni kingullerni takkussortut, Pitsi Høegh oqarpoq. Tamatuma saniatigut takornariaqaruttortarfik sivitsorpoq, nunattalu avataaniit tikeriaannaanngorneranik kinguneqartussamik mittarfissuassat ammangajalerlutik.

- Nunaqavissut takornarialerisunngornissamik kajumittut takkussorput. Uanga isumaqarpunga ersissutissaqanngitsugut aningaasaliisussanik, taavalu aamma takornarialerinerup iluani sulerusussinnaasunik. Takkutissaqqaarput, Pitsi Høegh oqarpoq.

Nunaqavissullu nunatsinni takornariartitsinermi inerisaanissamut akisussaaffimmik tigumminnittuusariaqartut, Ilulissaneersoq Jan Cortsen aamma isumaqarpoq. Nunaqavissunimmi suleqatiserinninnatik nunanit allaneersut nammineq umiatsiaminnik nunatsinni takornariartitsisut taassumunnga takornartaanngillat.

- Atassuteqarfigiuminaattarput. Nunatsinnimi takornariartitsiviit minnerit inerisaaniarnerannut ikiuunneq imminut akilersinnaagaluarpoq. Nunaqavissuusugummi takornarianut tunniussaqarsinnaaqaagut. Sumi kunisseqqaarsimanersugut illoqarfitsinnilu nalaassatsinnik migisatsinnillu allanik oqaluttuussinnaavagut, Jan Cortsen qungujulalluni oqarpoq.

Assi © : Ilulissat Local Guide

Nunaqavissut suliatigut kivitseqataanerorusuttut

Topasip pisortaa Disko Linemi aamma pisortaasup Michael Højgaardip takornariartitsinermut inatsisissatut siunnersuut taperserpallaanngilaa, nunaqavissulli nunatsinni takornariartitsinermi suliatigut kivitseqataanerulernissaat ajoriffissaqartinnagu.

Taanna Topasip suliaanik nunaqavissut tigorusutaannik tunniussinissamut allaat piareeqqavoq. Topasilli suliani allanit tigunissaqanngimmata, umiatsiminik nunatsinni nammineq takornariartitsisarput.

- Nunakkut pisunnissamik nunaqavissunit neqerooruteqartoqarpat, taava angernissarput ilimanarpoq. Ingerlatatta ilaat allanik aallartitsisoqanngimmat aatsaat pilersippavut, taanna oqarpoq.

Neqooruuteqarnissamillu piareeqqallutik, Jan Cortsenip oqaatigaa.

Tamannalu Ilulissani takornarialerisut allat 13-it peqatigalugit Ilulissat Excursionsimik pilersitsineranut ilaatigut pissutaavoq. Taakkualu neqeroorutissaminnik kisimiillutik naammassisinnaanngisaminnik ataqatigiissaareqatigiittarput.

Assersuutigalugu umiarsuarlutik nunatsinnut takornarianik 130-t 140-llu akornanni amerlatigisunik umiatsiamik angallassinissamik neqerooruteqartalernikuupput.

- Assut piareeqqavugut. Akisussaaffik tigorusoqaarput!, Jan Cortsen oqarpoq.

Takornariartitsinermut inatsisissatut siunnersuut Inatsisartut novembarip ulluisa 15-ianni aappassaaniissavaat novembarillu ulluisa 21-anni pingajussaaniissallugu.