Isumaqatigiissut nutaaq nunatsinni imartat avatangiisaannik illersuilluarnerutitsissasoq
Namminersorlutik Oqartussat Illersornissaqarfiullu Kalaallit Nunaanni imartat avatangiisaanni upalungaarsimanerup pitsanngorsarneqarnissaa isumaqatigiissutigaat.
Kalaallit Nunaata Danmarkillu ilaatigut mingutsitsinermut akiuiniarnermut atortutigut Illersornissaqarfimmiillu immikkut ilisimasatigut tapersersoqatigiissinnaanissaat, isumaqatigiissummi nutaami qulakkeerneqartoq naalakkersuisut nittartagaanni ilaatigut allassimavoq.
Mingutsitsinermik akiuiniarnermi Illersornissaqarfiup atortuni Greenland Oil Spill Response A/S-imi assersuutigalugu inississinnaalissavai.
Illersornissaqarfiup ilisimasaasa Kalaallit Nunaata aamma iluaqutigisinnaalissavai.
Naalakkersuisut tusagassiutinut taama allaaserisaqarput:
- Matumani isumaqatigiissuteqarnermi Kalaallit Nunaata aamma Danmarkip akornanni qaninnerusumik suleqatigiinnerup naleqartinneqarnera takutinneqarpoq. Ataatsimoorluta ilisimasatsinnik isumalluutitsinnillu atuinitsigut angusassagut annertunerussapput, Illersornissamut ministeri Trine Bramsen oqarpoq:
- Isumaqatigiissutip kingunerisaanik atortut pisinnaasallu Greenland Oil Spill Response A/S-imi pigineqartut ataatsimoorluta iluaqutissatsinnik pitsaasumik atorneqartussanngorput. Imartat avatangiisaat aamma pinngortitamik illersuineq Naalakkersuisut pingaarnersiuinerminni salliutittuaannarpaat, Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq, Jess Svane, oqarpoq.
Suleqatigiinnissamut isumaqatigiissuteqarnermi Kalaallit Nunaata aamma Danmarkip akornanni akisussaaffiit agguagaanerat allanngortinneqanngilaq, kisianni Kalaallit Nunaata eqqaani imartat avatangiisaasa sapinngisamik pitsaanerpaamik paarilluarnissaannik ataatsimoorluni kissaateqarnermut takussutissaalluni.
