Kina Issittoq pillugu aallartitanngussanersoq paasinarsingajalerunartoq
Kunngeqarfiup kinamita Issittoq pillugu aallartitanngortissavaa? Tamatuma akineqarsinnaannginnera ukiup affaa sinnersimalerpaa. Danmarkimmi nunanut allanut ministereqarfiata nunatsinneersuunngitsumik danskimilli Issittoq pillugu aallartitanngortitseqqeereerneranili tamanna suli maannamut oqallisaavoq.
Naalakkersuisut Danmarkip nunanut allanut ministereqarfiata taamaaliorneranut akerliulluinnarput, taakkumi isumaqarput Danmarkip naalakkersuisui nunatsinneersumik Issittoq pillugu aallartitanngortitsisariaqartut. Tamanna sivisuumik nangaassutigeerlugu allatut periuseqarlutik Issittoq pillugu aallartitanngortitsisalerniarlutik, Danmarkip nunanut allanut ministeria Lars Løkke Rasmussen (Moderaterne) oqarpoq.
Taamanilili pisoqaqqinngilaq. Issittormi pillugu aallartitatut atorfik septembarimili inuttaqanngilaq, atorfimmullu tassunga toqqagaagaluartoq sulilinngiinnarpoq.
Nalagaaffeqatigiilli aaqqiissuteqarnissaminnut qanilliallassimarpasipput.
Decembarimili arlaleriarlutik ataatsimiittut
Naalagaaffeqatigiimmi tamannarpiaq pillugu piffissami kingullermi arlaleriarlutik ataatsimeeqatigiittareertut, Naalagaaffinngornissamut Nunanullu Allanut tunngasuni Naalakkersuisoqarfik Danmarkillu nunanut allanut ministereqarfia uppernarsaapput.
- Danmark, Kalaallit Nunaat Savalimmiullu tamannarpiaq pillugu oqaloqatigiittarput.
- Suleqatigiissitanik Kunngeqarfimmi naalagaaffeqatigiit tamaneersunit sinniisuutitalinnik pilersitsisoqarallarpoq, taakkualu Kunngeqarfiup Issittoq pillugu Siunnersuisoqatigiinni siulittaasunngornissaa pilersaarusiorlugulu tamatumani suliassat assigiinngitsut agguataassavaat.
Danmarkip nunanut allanut ministereqarfia KNR-imut akissummini taama allappoq. Suleqatigiissitallu qanga ataatsimeeqatigiittalersimanersut akissumminni aamma allappoq:
- Suleqatigiissitat 2023-mi decembarip 14-ianili arleriarlutik ataatsimiipput, Danmarkip nunanut allanut ministereqarfia allappoq.
Naalagaaffinngornissamut Nunanullu Allanut tunngasuni Naalakkersuisoqarfik aamma isumaqatiginninniaqataasuusoq akissummini taamatorpiaq aamma allappoq.
Suliamili tassani kiisami qanoq pisoqalerunartoq, aamma erseqqissaavoq:
- Allanik oqallisiginninnissaq pisariaqalersimanngippat Issittoq pillugu marsimi aallartitanngortitsisoqassaneranik nalunaarfigineqarnissatsinnut utaqquvugut, Naalagaaffinngornissamut Nunanullu Allanut tunngasuni Naalakkersuisoq Vivian Motzfeldt (S) KNR-imut akissummini allappoq.
Nunatsinneersumik piukkussaminnik suli innersuussaqanngitsut
Kina Issittoq pillugu aallartitanngortitaassanersoq, naalakkersuisullu piumasaat naapertorlugu nunatsinneersumik ilumut aallartitanngortitsisoqassanersoq, suli aalajangerneqanngilaq.
Naalakkersuisut nunatsinneersunik Issittoq pillugu aallartitanngortitassatut piukkussaminnik innersuussaqarsimanersut, Vivian Motzfeldtimut aperaarput. Taannali oqaluttuamik uuminnga saqqummiitinnata akinngilaatigut.
Naalagaaffeqatigiilli, tassa nunarput, Danmark Savalimmiullu, siorna juunimi ataatsimeereernerminniillii maannamut arlaleriarlutik ataatsimiittareernerat suliap taassuma naammassinissaanut qanilliallaataasussaassaaq. Allatummi periuseqarlutik Issittoq pillugu aallartitanngortitsisalissallutik, Danmarkip nunanut allanut ministeria, Lars Løkke Rasmussen, taamanikkut nalunaarpoq.
Issittoq pillugu kingullermik aallartitanngortitanngortitaagaluartoq, Tobias Elling Rehfeld, siorna septembarip aallaqqaataani sulilertussaagaluarluni suli sulilinngilaq. Taanna Danmarkip nunanut allanut ministereqarfiata Issittoq Amerika Avannarlerlu pillugit immikkoortuata allattoqarfiani maanna pisortaavoq.
