Akisoqanngilaq: Issittoq pillugu aallartitaq nutaaq aallartippa?

Issittoq pillugu aallartitaq ullumi aallartippa? 

Nunanut Allanut Naalakkersuisoq Vivian Motzfeldt (S) aperineqarami akivoq: 

- Akisinnaanngilara. Danmarkimit tamanna akineqassaaq. Allamik ilisimatinneqanngilanga.

Apeqqummilli KNR Danmarkimi nunanut allanut ministereqarfimmut ingerlatitseqqimmat, akissutigineqarpoq:

- Nunanut Allanut, Isumannaallisaanermut Illersornissamullu Politikkikkut Attaveqaatitut Ataatsimiititaliap Nuummi juunimi ataatsimiinneranit inaarutaasumik nalunaarummi isumaqatigiissutigineqarpoq ”Kalaallit Nunaanni Naalakkersuisut Danmarkimilu naalakkersuisut Issittumi aallartitamik toqqaasarnermut tunngatillugu aaqqiissutissarsiorluni oqaloqatigiittarnerisa nanginneqarnissaa”. Oqaloqatigiinneq ingerlavoq.

Imaappa issittoq pillugu aallartitaq nutaaq aallartissimasoq?

- Isumaqarpoq oqaloqatigiittoqartoq. Annertunerusumik oqarsinnaanngilagut, nunanut allanut ministereqarfimmit allakkatigut taama akissuteqarput.

Taamaammat Tobias Elling Rehfeldt, issittoq pillugu aallartitatut marsimi atorfinitsinneqartoq ullumi sulilersimanera pillugu apeqqut ammaannarpoq, nunani taakkunannga marlunnit akineqarsinnaanngitsoq. 

Annertuunik oqallisaasoq

Danmark issittoq pillugu aallartitamik toqqaagami tallimassaa qallunaamik toqqaavoq.

Tamanna marsimi Atlantikumi nillertumik silaannaqalersitsivoq.

Naalakkersuisummi naapertorlugit ingerlatsinermi peqataatinneqarsimanngillat.

- Issittoq pillugu aallartitassaq pillugu isummagut Naalakkersuisunit ingerlateqqippagut. Nunanut allanut ministerimik unneqqarissumik oqaloqateqarpugut, apeqqullu Lars Løkke Rasmussenimit ersarissumik itigartitsissutigineqarluni, Vivian Motzfeldt KNR-imut marsimi oqarpoq.

- Ersarissumik kissaateqarnerput tusarneqarumanngippat nammineq issittoq pillugu aallartitassarsinissatsinnut partiit allat tapersersuerusunnersut tusarusuppakka, oqarpoq.

Nunanulli allanut ministerip Politiken aqqutigalugu tikkuarpaa, nammineq isumaqarluni suleqatini kalaaleq Vivian Motzfeldt Danmarkimi nunanut allanut sullissinerup qanoq aaqqissuussaasimanera pillugu peqqissaartumik oqaloqatigisimallugu.

Ilutigitillugu Lars Løkke Rasmussenip issittoq pillugu aallartitap kalaallimik inuttalerneqarnissaa Politikenimi itigartitsissutigaa.

- Danmarkimi nunanut allanut sullissinermi atorfinitsitsigaangatta inuiaassuseq piumasaqaatinut ilaaneq ajorpoq, Lars Løkke Rasmussen Danmarkimi aviisimut oqarpoq.

Múte B. Egedep nassuiaat tamanna akuerinngilaa:

- Periaasiisigut nunanut allanut ministereqarfimmit qanoq isigineqarnerput kunngerqarfimmilu issittumi nunatut peqataatinneqannginnerput takuneqarsinnaavoq. Assiliaq nammineq oqaluttuarpoq, maajimi Politikenimut oqarpoq.

Siunissami allaanerulissaaq

Naalagaaffeqatigiit Nuummi aasaq ataatsimiinneranni issittoq pillugu aallartitaq diplomatimillu qallunaamik toqqaaneq aamma sammineqarpoq.

Nunanut allanut ministerimit Lars Løkke Rasmussenimit (M) oqariartuut allaaneruvoq.

Tassanimi oqaluttuarpoq issittoq pillugu aallartitamik toqqaasarneq siunissami allaanerulissasoq.

Aalajangersimasumilli tamanna qanoq nassataqassanersoq, nunatsinni naalakkersuisut Danmarkimilu naalakkersuisut akornanni Naalagaaffeqatigiit ataatsimiinneranni Attaveqaatitullu Ataatsimiititaliami ataatsimiinnermi isumaqatigiissutigineqanngilaq.

Kisianni Naalakkersuisut Siulittaasuannit Múte B. Egedemit (IA) oqaatigineqartut allanngunngillat. Isumaat naapertorlugu isumalimmik aaqqiissut ataasiinnaavoq.

- Issittoq pillugu aallartitaq Kalaallit Nunaanneerpat naammagaara, allatullu aaqqiissutissarsissagutta nammineq nassaarnissarput eqqarsaatigilertariaqassavarput.

KNR-imit Tobias Elling Rehfeldt attaviginiarneqarsimagaluarpoq iluatsinngitsumik.