Løkke: Kalaallit Nunaat Issittumut aallartitamik toqqaaqataassanngilaq

Danmarkip nunanut allanut tunngasunut ministeriata Lars Løkke Rasmussenip Kalaallit Nunaannik aporaatilersinnaanissaa aarlerigineqarsinnaavoq.

Naalagaaffeqatigiinnimi nunat allat issittumut aallartitamik toqqaanissamut sunniuteqarnavianngitsut, tassalu toqqaaqataanavianngitsut, Lars Løkke Rasmussen aviisimut Politikenimut oqarpoq.

- Assersuutissaannaavoq, tamannalu ajuusaarutigaara. Tamannami pillugu Kalaallit Nunaata nunanut allanut tunngasunut naalakkersuisua Vivian Motzfeldt oqaloqatigilluareerpara, Lars Løkke Rasmussen aviisimut Politikenimut oqarpoq.

Danmarkip Sydafrikami aallartitaa Tobias Elling Rehfeld Issittumi aallartitatut toqqarneqaqqammerpoq, aallartitatullu ukiaru atuutilissalluni.

Kalaallit Nunaatalu toqqaaqataannginnera Kalaallit Nunaannit isornartorsiorneqarpoq.

Savalimmiut Kalaallit Nunaallu pillugit aalajangiisoqaleraangat Savalimmiut Kalaallit Nunaallu aalajangeeqataasarnissaat Danmarkimi naalakkersuisoqatigiit isumaqatigiissutaaanni allassimanngilaq.

Kalaallit Nunaata aalajangeeqataaneq ajornera, naalakkersuisut siulittaasuata Múte B. Egedep (IA) ajornartorsiutaasutut aviisimut Sermitsiamut taavaa, tamannalu pillugu naalagaaffeqatigiit juulimi ataatsimiinnissaanni oqaloqatigiinnissaat pilersaarutigalugu.

- Ersarilluinnartumik kissaateqarpugut. Toqqaaniarnermi sunniuteqaqataarusuppugut, taanna oqarpoq.

Issittumut aallartitap Kalaallit Nunaannit tunuliaqutaqarnissaa pissusissamisoortoq, Folketingimut ilaasortaq Aaja Chemnitz (IA) isumaqarpoq.

Nunasiaateqarniatut pissusilersortoqartoq taanna oqarpoq.

Issittumut aallartitaq Kalaallit Nunaanneersuussasoq Folketingimut ilaasortaq Aki-Matilda Høegh-Dam isumaqarpoq.

Issittumut aallartitap pinngitsoorani Kalaallit Nunaanneersuunissaa Lars Løkke Rasmussenip akuersaarumanngilaa.

- Nunanut allanut tunngasuni atorfinitsiniaraangatta inuiaassuseq aalajangiinermi toqqammavigineq ajorparput, Løkke Politikenimut oqarpoq.

Suliaq Kalaallit Nunaannit takussutissaannartut isigineqalersimasoq Løkke isumaqarpoq.

/ritzau/