Immikkut ilisimasalik Issittoq pillugu aallartitarnngortoq pillugu: Kalaallit Nunaata Danmarkip nunanut allanut ministereqarfiata ileqqua apeqquserpaa
Dannmarkip naalakkersuisuisa Issittumeersuunngitsumik danskimilli tallimassaannik Issittoq pillugu aallartitanngortitsinerat, nunatta Danmarkillu akornanni saqitsaataavoq.
Danmarkilli nunanut allanut ministereqarfia Københavnimiittoq Danmarkimi aallartitanngortitsinermi ileqquusoq maliinnaraa, Issittoq pillugu immikkut ilisimasalik aamma Dansk Institut for Internationale Studierimi ilisimatusartuuneq Ulrik Pram Gad oqarpoq.
- Danmarkip suliamut piginnaasallit aallartitassaqqinnerpaasartutut isigiuarsimavai. Nunanullu allanut ministereqarfimmi atorfilinnik aallartitanngortitsinikkut tamanna qularnaartarpaat.
Nunat allat, soorlu USA-p Norgellu, aallartitaat nuimanerullutik politikeriusimasuukkajupput. Taakkuali parteertik pinnagu nunagisaminnili naalakkersuisut sinniisuuffigalugit sulisarput.
Nunarput Issittumeersumik, tassa nunatsinneersumik, aallartitanngortitsinissamut piukkussaqarsimagaluartoq, Nunanut allanut tunngasuni, Inuussutissarsiornermut Niuernermullu Naalakkersuisoq Vivian Motzfeldt (S) oqarpoq. Danmarkilli nunanut allanut ministeria Lars Løkke Rasmussen (M) taamaaliornissamut itigartitsilluinnarpoq.
Immkkut ilisimasalik: Issittoq pillugu aallartitap suliai aallartitat allat suliaannit allaanerusut
Issittorli pillugu aallartitap suliai aallartit allat suliaannit allaaneroqisut, Ulrik Pram Gad oqarpoq.
Siullermik Issittoq pillugu aallartitaq aallartitat allatulli Kunngeqarfiup avataanut suliartortitaanani nunanut allanut ministereqarfimmi Københavnimiittumi allaffeqarluni sulisarpoq, taannalu ministereqarfiup Issittoq aamma Amerika Avannarleq pillugit immikkoortuata pisortaatut atorfeqarluni sulisarpoq.
Kunngeqarfiulli Issittumi soqutigisai pillugit sinniisuutut nunani allani ataatsimeeqataallunilu isumaqatigiinniaqataasarpoq.
Taannali Danmarkip aallartitai allat assigalugit Danmarkip naalakkersuisui sinniisuuffigalugit taakkua politikkikkut suliaannut tunngasunik suliaqartarpoq, nunattali soqutigisai immikkut pingaartutut suliarisarlugit.
Taamaammallu nunanut allanut ministereqarfiup ileqquusumit allaanerusuliorluni Issittumeersumik Issittoq pillugu aallartitanngortitsisimasinnaagaluartoq, Ulrik Pram Gad oqarpoq.
- Kalaallit Nunaammi Danmarkiunngitsorlu Issittumiimmat, taassuma suliai aallartitat allat suliaannit allaanerunerat toqqaalernermi tunngavilersuutigilluarsimasinnaagaluarpaat.
Naalakkersuisut nunatsinneersumik Issittoq pillugu aallartitanngortitsinissamik siunnersuutaat Danmarkip naalakkersuisuisa sooq itigartitsissutigineraat maannamut suli ilisimatinneqanngilagut.
Tamanna Vivian Motzfeldtimut toqqaannartumik oqaloqatiginnissutigerusunnerugini marluullutillu oqaloqatigiilluartarlutik, nunanut allanut ministeri Lars Løkke Rasmussen KNR-imut akissummini allappoq.
Issittoq pillugu aallartitatut atorfik isumaqatigiinniutigeriaannaagaat
Danmarkip naalakkersuisuisa itigartitsinerannut peqqutaasimasinnaasut pingasuusut, Ulrik Pram Gad isumaqarpoq:
Siullermik ministereqarfiup aallartitanngortitap kulturia apeqqutaatinnagu suliamulli piginnaasaqarnissaanik ukiorpassuanngortuni pingaartitsisuunini aalajangiusimaannarusussimasinnaavaa.
Aappassaanik nunatsinneersumik aallartitanngortitserusussimasinnaavoq, piukkussorisaminilli Danmarkip naalakkersuisuinut sinniisoorusuttumik nassaanngitsoorsimasinnaalluni.
Pingajussaanik Issittoq pillugu aallartitatut atorfik Naalagaaffeqatigiinni atuuttussamik Issittoq pillugu ataatsimoorussamik periusissiaqalernissamik isumaqatigiinniutitut sakkorerusussimarataannaavaat.
Periusissialiassaq nunatta peqataaffigerusunnerlugu maannamut oqaatigereerusunngilaa. Tamannalu Inatsisartut aalajangiiffigeqqaassagaat, Vivian Motzfeldt oqarpoq.
- Tamanna pillugu oqallisileruttornerput Kalaallit Nunaanneersumik Issittoq pillugu tullianik aallartitanngortitsinissap Issittoq pillugu ataatsimoorussamik periusissialiornermi isumaqatigiinniutigeriaannaaneranut aallarniutaarataannaavoq. Nalunarumaanngilaq, Ulrik Pram Gad oqarpoq.
Aallartitaqarfinni allani pisortanngortitsiniarnermi maleruagassat Issittoq pillugu aallartitanngortitsiniarnermi tamatigut naapertorneqartartut, nunanut allanut ministereqarfik KNR-imut ilisimatitsivoq.