Aki-Matilda Høegh-Dam Issittoq pillugu aallartitanngortoq pillugu: Kalaallit Nunaanneertuuneq immikkut ilisimasaqartooreertitsivoq
Kunngeqarfiup danskit nunanut allanut ministereqarfiata Issittoq pillugu aallartitassamik toqqaagaangami, toqakkami inuiaassusia ilanngullugu isiginiartartussaavaa.
Kalaallit Nunaanneertuunermi Issittoq tamaanilu inuuneq pillugit immikkut ilisimasaqartooreertitsilluinnartoq, Folketingimi ilaasortaq Siumumeersoq Aki-Matilda Høegh-Dam partiit siuttuisa Folketingimi ippassaq marlunngornermi oqallinneranni erseqqissaavoq.
- Aallartitanngortitap suliamut piginnaasaqarnissaa pingaartipparput, taassumalu Issitup inuisa taakkualu kulturiat, oqaasii, suminngaanneersuunerat agguataarnerallu pillugit ilisimasaqarnissaanik naatsorsuuteqarnerput inissaminiissoraarput. Taamalu pingaartigisumut atorfinitsitamut taama piumasaqarneq paasiuminarsoralugulu naleqqussoraarput, Aki-Matilda Høegh-Dam oqalugiarami oqarpoq.
SF-ip Kalaallit Nunaat pillugu oqaaseqartartua, Karsten Hønge, tamanna pillugu Danmarkimi Radio4-mut oqaaseqareersorlu oqallisaalerpoq. Taassumami Siumup danskit naalakkersuisui danskiunngitsumik nunatsinneersumilli naalagaaffeqatigiinnut Issittoq pillugu aallartitanngortitsinissaannik piumasaqarnera isornartorsiorpaa.
Siumummi ammip qalipaataa aallartitap suliamut piginnaasaqarneraniit pingaarnerutikkaa taamaalilluni ersertoq, taanna isumaqarpoq.
- Aallartitanngortoq suliamut piukkunnarluinnaraluartoq Danmarkiminngaanneersunik kingoqqisuunera piinnarlugu piukkunnannginneraaneq - ukorsiiaa. Oqallinneq una Danmarkimi polikkikkut oqallinnerni inerniliukkusunngisatsinnut killikkumaartoq kialuunniit takusinnaasariaqarpaa, Karsten Hønge Radio4-mut oqarpoq.
Taanna Folketingimi ippassaq marlunngornermi ima oqarpoq:
- Ammip qalipaataa tunngavigalugu assigiinngisitsinermut akuersaartuunnginnatta ammip qalipaataa tunngavigalugu atorfinitsitsinissamik piumasaqarneq tapersinngilarput.
Siumut: Naligiissitaaneq inuiaassutsinut tunngasuni aamma atuulli
Danmarkimeersumik aallartitanngortitsineq Naalakkersuisut aamma isoraat. Nunatsinneersumimmi aallartitanngortitsinissaq kissaatigigitsik Naalakkersuisut erseqqissaatiginikuugaluaraat, Nunanut allanut tunngasunut, Inuussutissarsiornermut Niuernermullu Naalakkersuisoqarfik KNR-imut ilisimatitsivoq.
Pisortat suliffeqarfiutaanni pisortanngortitsisarnerni arnat ikinnerpaaffilerlugit amerlassusilerneqartarnissaannik siunnersuuteqalersaarlutik, danskit nunanut allanut ministeriat Danmarkimilu naalakkersuisuutitaqartut Moderatit siulittaasuat Lars Løkke Rasmussen Folketingimi oqallinnermi oqarpoq.
Taamaammat naligiissitaaneq inuiannut Danmarkimi ikinnerussuteqartuusunut, soorlu kalaallinut, aamma atuutsilersaarneraat, Aki-Matilda Høegh-Damip apeqqutigaa.
Apeqqutaali siunnersuutigilersaagartillu naleqqersuunneqarsinnaanngitsut, Lars Løkke Rasmussen isumaqarpoq.
- Tamanna arnanik angutinillu amerlassusiliisarnerup ilungersunartortaanut sanilliunneqarsinnaanngitsoq isumaqarpunga, taanna oqarpoq.
Kalaallit Nunaanneersut Issittoq pillugu danskininngarnit ilisimasaqarnerusuunerat qularinngikkini, danskit ministeriunerat Mette Frederiksen (S) erseqqissaavoq.
- Kalaallit Nunaanneersuusut Issittoq pillugu naalagaaffeqatigiinnit allaninngaannersunit ilisimasaqarnerusut qularnanngilaq. Danmarkimiittuusugut tamatumani kinguarsimavugut.
Taassumali Issittoq pillugu aallartitanngoqqammertoq oqaaseqarfiginngilaa, imali oqarluni:
- Naalakkersuisoqatigiinni Kalaallit Nunaat pillugu kalaallininngarnit ilisimasaqarnerunerartortaqanngilagut. Taama oqarnissamik eqqarsaateqarsinnaanngilagulluunniit. Aamma ataqqeqatigiinnissarput pingaarpoq.
Aki-Matilda Høegh-Dam ministeriunermut akissuteqarami Lars Løkke Rasmussen pillugu ima oqarpoq:
- Socialdemokratillu suleqatigiinnerput pissarsiviulluarpoq. Partiinili allani aamma naalakkersuutitaqartuni aamma taamaassasoq neriuutigiinnarpara.
