Motzfeldt: Danmark naggueqatigiinnit inunnit issittoq pillugu aallartitamik toqqaasariaqaraluarpoq
Danskit naalakkersuisuisa kunngeqarfiup Issittumi soqutigisai pillugit aallartitaqarneranni aallartitaq Issittumit – nunatsinneersuusariaqaraluarpoq.
Nunanut allanut tunngasunut, inuussutissarsiornermut, niuernermullu naalakkersuisoq, Vivian Motzfeldt (S) isumaqarpoq.
Danskit nunanut allanut tunngasunut ministeriat, Lars Løkke Rasmussen (M) Naalakkersuisut kiap aallartitaasariaqarneranik kissaataannik qaangiiginnarsimasoq taanna KNR-imut mailikkut allappoq.
- Naalakkersuisut tungaanniit Issittoq pillugu aallartitaalertussamut atatillugu qanoq isumaqarnerput oqaatiginikuuarput. Nunanut allanut tunngasunut ministeri oqaluuteqqissaarparput, Lars Løkke Rasmussenillu apeqqummut ersarissumik itigartippaatigut, Vivian Motzfeldt oqarpoq.
Tobias Elling Rehfeld issittoq pillugu aallartitanngortoq Danmarkip Afrika kujallermi aallartitaqarfianneersuuvoq, taannalu naalagaaffeqatigiinnit issittoq pillugu aallartitat tallimassaraat. Taassuma 2019-imili issittoq pillugu aallartitaasoq, Thomas Winkler taarserpaa.
Vivian Motzfeldtip oqarnera naapertorlugu danskit naalakkersuisuisa Savalimmiut Kalaallit Nunaallu suleqatigalugit ataatsimoortumik issittoq pillugu periusissiorusunnerat tamatumalu saniatigut Københavnimi nunanut allanut tunngasunut ministereqarfimmi issittoq pillugu aallartitamik danskimik inissiinerat imminut akerleriipput.
- Kunngeqarfimmi Issittoq pillugu Aallartitamik toqqaanermi kunngeqarfimmi issittormiortatuaat toqqaanissamut apeqqummi tusaaneqannginnerat imaluunniit ilaatinneqannginnerat arajutsisassaanngilaq, naalakkersuisoq oqarpoq, nangillunilu:
- Danmarkip immaqa Canada Australialu ilikkagaqarfigilaarsinnaavai, taakkunanimi atuuffinnut pingaaruteqartunut nunap inoqqaavineersunit aallartitaqartoqarsinnaavoq.
Motzfeldtip parteeqataasa folketingimut ilaasortap, Aki-Matilda Høegh-Damip (S) aamma Inatsisartunut ilaasortap, Kuno Fenckerip aalajangiineq aamma isornartorsiornikuuaat.
Aki-Matilda Høegh-Damip Folketingimi qaammammi matumani siusinnerusukkut oqalugiarnermini danskit naalakkersuisuisa nunap inoqqaavisa ilisimasaat nunanut allanut tunngasunut politikkimi ilanngunniarneqartut allagartaatigaat, tamannali taassuma oqarnera naapertorlugu malinneqanngilaq.
- Taama isumaqaraanni issittoq pillugu aallartitaaffiup Issittumi angerlarsimaffeqartumit atuuffigineqarnissaa nassuerutigineqartariaqarpoq, taanna oqarpoq.
Danskit partiivi: Inuiaassuseq piginnaasanit pingaarnerunngilaq
Danskilli partiivisa arlallit oqarnerat naapertorlugu Siumup toqqaanermik isornartorsiuinera tupinnarpoq.
SF-ip Kalaallit Nunaannut tunngasunut oqaaseqartartuata, Karsten Høngep suliatigut piginnaasat aallartitap suminngaanneerneranit pingaarnerusut Danmarkimi Radio4-mut oqaatigaa.
- Naak aallartitatut qaffasissumik tunuliaqutaraluartoq danskisut inuiaassuseqarnera piinnarlugu atorsinnaanngitsutut oqaatigineqarsinnaanngilaq. Kialuunniit takusinnaavaa una kissaatiginngisatsitut inississasoq, tassa politikkikkut oqallinnerit Danmarkimiissasut.
Aamma Dansk Folkepartiip nunanut allanut tunngasunut oqaaseqartartuata, Anders Vistisenip Siumup inuiaassusermik tunuliaqutaqarnermik eqqartuinera Radio4-kkut isornartorsiorpaa.
- Toqqaanernik inuiaassusermik tunuliaqutaqarnissamik piumasaqartoqarnera siuariarnertut takujuminaappoq. Piviususimmi taama piumasaqarput.
KNR-ip Danmarkimi Nunanut allanut tunngasunut ministereqarfik naalakkersuisup, Vivian Motzfeldtip (S) isornartorsiuineranut oqaaseqartinniarlugu attavigaa. Ministereqarfik saaffiginnissummut suli akissuteqanngilaq.
