Lars Løkke nunatsinnut: Issittoq pillugu periusissiaq naammassiniarli
Ilanngussineq: Ilanngutassiami matumani Inatsisartuni nunanut allanut tunngasunut sillimaniarnermullu ataatsimiititaliap siulittaasuata, Mariia Simonsenip (IA) oqaaseqarnera ilanngunneqarpoq.
- Kalaallit inatsisartuisa periusissiornerat naammassilertorsinnaappat iluassagaluarpoq.
Danmarkimi naalakkersuisoqatigiit issittoq pillugu ukiumoortumik paasissutissiillutik sapaatit-akunnerata siuliani oqallinneranni nunanut allanut tunngasunut ministeri Lars Løkke Rasmussen (M) Folketingimi oqaluttarfimmiit taama oqarpoq.
Issittumi nunanut allanut tunngasunut sillimaniarnermullu politikki pillugu sulinermi qanoq ingerlasoqarneranik aamma issittumi pisunut tunngatillugu kunngeqarfiup Danmarkip Folketingillu qanoq periuseqarnissaat paasissutissiinermi killiffissiorneqartussaapput.
Nunatta nammineq issittoq pillugu periussissiaanik saqqummiussinissaq utaqqineqarmat naalagaaffik issittoq pillugu periusissiaqanngitsoq nunanut allanut tunngasunut ministerip saniatigut partiit arlallit oqallinnermi uparuarpaat.
Naalagaaffimmut tamarmut issittoq pillugu periusissiaq ukiut marluk matuma siornali 2020-mi qaangiutereerpoq.
Nunatta issittoq pillugu namminerisaminik periusissiornissaanik kissaateqarneq naalakkersuisut taamani nalunaarutigaat taamatullu naalagaaffeqatigiit ataatsimut issittoq pillugu tamakkiisumik periusissiorlutik isumaqatigiinniarnissaanni atorneqarsinnaassalluni.
Aqaguunani ullumiikkuusinnaavoq, Lars Løkke Rasmussen oqaluttarfimmiit Nuummut inussiarnersumik tuavisaaraluni oqarpoq:
- Naalagaaffeqatigiinni illoqarfiit pingaarnerit pingasut ataatsimut suleqatigiillutik issittoq pillugu periussissiaq isumaqatigiissutaat atorfissaqartilluinnarparput.
Utaqqineq, utaqqineq, utaqqineq…
Lars Løkke Rasmussen Nuummut februaarimi tikeraarnermi nalaani KNR-imit apersorneqarnermini oqarpoq kalaallit partiivisa nunanik allanik suleqateqarnermi qanoq iliornissamut aalajangernissaannut erinitsalluni.
Taassuma tikeraarnissaa sapaatit-akunnerinik arlalinnik sioqqullugu nutaarsiassaqartitsivik Altinget Arktis allappoq nunanut allanut tunngasunut naalakkersuisoq Vivian Motzfeldt (S) naapertorlugu nunatta issittoq pillugu periusissiaa nutaaq inatsisartunut sapaatit-akunnialui qaangiuppata saqqummiunneqarumaartoq.
Kisianni Inatsisartuni nunanut allanut tunngasunut sillimaniarnermullu politikkikkut ataatsimiititaliap siulittaasuata, Mariia Simonsenip IA-meersup oqarnera naapertorlugu ataatsimiititaliap periusissiaq suli takunngilaa. Taassumalu periusissiap ataatsimiititaliamut saqqummiunneqarnissaa naalakkersuisoqarfimmut aamma nukingisaarutigisimavaa.
- Taama sivisutiginissaa ittuuallannartorujussuuvoq, Mariia Simonsen til KNR-imut oqarpoq.
Periusissiornerup kinguaattoornera nunanut allanut naalakkersuisoqarfimmi ulapittoqarneranik pissuteqartoq naalakkersuisoqarfimmi pisortaq Mininnguaq Kleist Altinget Arktisimut oqarpoq.
Naalakkersuisut periusissiornerat sumut killinnersoq aamma Danmarkimi nunanut allanut tunngasunut naalakkersuisup ujartuinera naalakkersuisup Vivian Motzfeldtip qanoq oqaasissaqarfigineraa KNR-ip nunanut allanut tunngasunut naalakkersuisoqarfimmut paasiniarpaa. KNR-illi saaffiginnissutaa naalakkersuisoqarfimmit suli akineqanngilaq.
