Vivian Motzfeldt Løkkemit itigartinneqarami: Nammineerluta Issittoq pillugu aallartitartaarnissatsinnut piareersimasariaqarpugut

Issittoq pillugu aallartitaq kalaalliunissaanik piumasaqaat danskit naalagaaffianit tusarnaarusunngippat, nunarput nammineerlun aallartitaqalissasoq, Nunanut allanut naalakkersuisoq, Vivian Motzfeldt isumaqarpoq.

Allattoq Marie Kûitse Kristensen, Ann-Sophie Greve Møller, Jonna Enoksen Dahl

apriilip 25-at 2023 15:27

Danskit naalagaaffiat Issittoq pillugu aallartitamik Naalakkersuisut taaseqataatinnianngiinnarpagit nunarput nammineerluni aallartitartaarusuppoq.

Issittoq pillugu aallartitassamik toqqaaniarnermi naalagaaffeqatigiinnut Lars Løkke Rasmussenip akuutitsinnginnera pillugu, Nunanut allanut Naalakkersuisoq, Vivian Motzfeldt (S), taama oqarpoq.

- Taamatut oqaloqateqariaaseq uggornartutut isigaara. Nunasiaateqarneq qaangiutereerpoq, naligiimmik oqaloqatigiinnerit sulinitsinni aallaaviupput. Ullumikkullu killiffimmik oqaloqatigiinnerit naligissutut uanga tusaanngilakka. Tamannalu assorujussuaq uggornarpoq, Vivian Motzfeldt KNR-imut oqarpoq.

ISSITTOQ PILLUGU AALLARTITAQ SULERISUUA?

Issittoq pillugu aallartitaq Danmarkip nunanut allanut mintereqarfiani Københavnimiittumi allaffeqarpoq, taannalu ministereqarfiup Issittoq aamma Amerika Avannarleq pillugit immikkoortuata pisortaatut atorfeqarpoq.

Taanna Kunngeqarfiup, Savalimmiut Kalaallit Nunaata ataatsimoorussamik nunanut allanut politikkiannik taavalu USA-mik Canadamillu suleqateqarnermik aamma ataqatigiissaarisuuvoq.

Aamma Naalagaaffeqatigiit sinniisuuffigalugit atorfillit Issittumi Siunnersoqatigiillu ataatsimiinneranni peqataasarpoq.

Issittoq pillugu 2012-ip 2023-llu akornanni aallartitaasut ukuupput:

Klavs A. Holm (2012 - 2013)

Erik Vilstrup Lorenzen (2013 - 2016)

Hanne Fugl Eskjær (2016 - 2019)

Thomas Winkler (2019 - 2023)

Tobias Elling Rehfeld (2023 - )

Allisiguk

Issittoq pillugu aallartitassamik danskit naalagaaffiat Naalakkersuisunik akuutitsinani toqqaanerata kingorna aporaattoqalerpoq.

Issittoq pillugu aallartitaq nunatsinneersuussasoq Naalakkersuisut piumasarigaluarpaa, tamannali piumasaqaataanngitsoq danskit nunanut allanut ministeriata aalajangiusimavaa.

Issittoq pillugu aallartitaq kalaaliussanngitsoq, Løkke, aviisimut Politikenimut oqarpoq.

- Danmarkimi nunaanut allanut tunngasuni sullivitsinni atorfinitsitsinissani inuiaassuseq aallaavigineq ajorparput, Lars Løkke Rasmussen danskit aviisianut oqarpoq.

Danskinik atorfinitsitsinermut ataatsimiititaliaq

Issittoq pillugu aallartitamik danskit naalagaaffiat ataannartumik tallimariarluni maanna danskit atorfilittaanik atorfinitsitsivoq.

Nunatsinneersumilli aallartitartaartoqassasoq Naalakkersuisut kissaatigigaluarpaat.

Naalagaaffeqatigiinnermi issittumi inissisimasutuaq tassaavoq nunarput. Taamaammat nunatsinneersumik issittumi aallartitaqarnissaa pissusissamisoortuusoq, Vivian Motzfeldt isumaqarpoq.

- Tallimassaanik toqqaapput qallunaat, taakkunanilu toqqarneqarsimasuni arlaannaalluunniit nunatsinni najugaqarsimananilu aallaaveqanngilaq, taamaammallu aamma naatsorsuutigisariaqarpoq nunatsinni pissutsinik ilisimasaqanngitsoq aamma unammillikkatsinnik misilittagaqanngitsoq.

Vivian Motzfeldtip oqarnera naapertorlugu, Københavnimi nunanut allanut ministereqarfimmi atorfilittamik atorfinitsitsisarneq ileqqorineqartoq, danskit naalagaaffiata tunngavilersuutigaat.

Aamma atuaruk Immikkut ilisimasalik Issittoq pillugu aallartitarnngortoq pillugu: Kalaallit Nunaata Danmarkip nunanut allanut ministereqarfiata ileqqua apeqquserpaa

Ileqqorli taanna naalagaaffeqatigiit akunnerminni aalajangiisoqartalernissaa ileqqunngortariaqaraluartoq, taanna isumaqarpoq.

- Peqataatinneqarnissaq naatsorsuutigaarput, tamannalu pisimanngilaq. Tunngavilersuutinilu uku atorneqarput toqqaariatsimi allaffissornikkut ingerlanneqartarpoq. Isumaqarpunga tamanna nunatsinnik peqataatitsinerunngitsoq, Vivian Motzfeldt oqarpoq.

Kalaallimik Issittoq pillugu aallartitartaassaagut

Issittoq pillugu aallartitamik nunatsinneersumik atorfinitsitsineq periarfissaasoq, Naalakkersuisoq isumaqarpoq.

- Taannalu tunngavilersorneqassappat immaqa piginnaasatigut tassunga suli killissimannginnermik, taava oqaatigilara ajukkunnanngitsorsuarnik kalaalerpassuarnik peqarpugut tassani inissisimasinnaasumik.

Vivian Motzfeldt qinersisoqarnissaanik piareersimavoq.

Suliamut tunngatillugu akerleriittoqarnerani aaqqiisoqanngippat, Naalakkersuisut namminneerlutik Issittoq pillugu aallartitaqalernissaat, Vivian Motzfeldtip sulissutigerusuppaa.

- Uagut pineqartilluta avaqqunneqassanngikkutta toqqaarusunnitsinnillu oqariartuuteqarnerput malinneqanngippat partiinut oqaloqatigiissutissatut ingerlateqqissavara taamaalillungalu tunulequtaqarnerlunga qulakkeerlugu, tunulequtserneqaruma sulinera tassunga ingerlassaaq, taanna oqarpoq.

Nammineq aallartitaqalissagussi danskillu nunanut allanut ministereqarfiat aamma aallartitaqarluni, taava taamatut suliaqartut marloqiusanngussappat? Qanoq paasisariaava?

- Kalerrisaarutitut oqariartuutaavoq, nunatsinninngaaniit ima oqariartornerulluni; uagut pilluta aallartitamik uagutsinninngaanniit sinnerneqanngitsumik toqqaannaq ingerlanneqartuassappat, taava uagut aamma isummernissarput allamiilissaaq. Uagutsinnut pingaartitaq tassavoq, uagut pilluta oqaloqatigiinnerit uagut avaqqulluta ingerlanneqartassanngitsut.