- Kia aningaasaliissutigivaat? Amerikarmiut, taava tupinnassanngilaq taakku siunertanut tunngatillugu qulequttanut aalajangersimasunut ilumut atorneqassasut qulakkiissagaat. Tupinnartuliaanngilaq, Kim Kielsen oqarpoq.Assi: KNR

Kim Kielsen: USA-p aningaasaliissutitik namminneq aqussavaat

Amerikamiut soqutigisartik aallaavigalugu aningaasaliipput. Kisianni nunatsinnut iluaqutaassapput, Kim Kielsen oqarpoq.

Amerikamiut aningaasat tunniussatik namminneq aqussavaat. USA-p aningaasaliissutissai nunatta karsianut ikinavianngitsut, Naalakkersuisut siulittaasuat, Kim Kielsen (S) oqarpoq.

USA-p nunatsinnut soqutiginninnera
 

  • USA 83 millionit koruuninik nunatsinni suliniutinut assigiinngitsunut aningaasaliivoq. 
  • USA-p præsidentiata, Donald Trumpip, nunatsinnik pisiarinninnialikkersaarneraniit ukiup affaa sinnilaarlugu qaangiutereersorlu tamanna pivoq. 

2019: 

  • Aggustip ulluisa 15-iat 2019: Donald Trumpip nunarput pisiarinialikkersaaraa, USA-mi tusagassiorfiit allaatigaat. Aallaatigisaat kinaassutsimik isertuussisunit paasissutissanik aallaaveqarput.
  • Aggustip ulluisa 16-iat: Kalaallit Nunaat tuniniagaanngitsoq, Naalakkersuisut siulittaasuata, Kim Kielsenip (S), erseqqissarpaa. 
  • Danmarkip ministeriunerata, Mette Frederiksenip, tamanna pillugu oqallinneq pisariaqanngitsuunerarpaa. 
  • Donal Trumpip Mette Frederiksen ataatsimeeqatigiartorlugu septemarip ulluisa aappaanni pingajuannilu Københavnimiittussaagaluarpoq. Kim Kielsen Savamlimmiunilu lagmandi Københavnimi aamma ataatsimeeqataasussaagaluarput. Issittoq isumannaallisaanermullu politikki pillugit ataatsimeeqatigiittussaagaluarput, Trumpilli tikeraarnissaraluani taamaatippaa.
  • USA sinniisoqarfimmik nunatsinni aammaaqqinnissaminut pilersaartoq, nutaarsiassaqartitsivik AP Amerikap nunanut allanut tunngasunut ministereqarfiata Amerikami naalagaaffiit inatsisartuinut allagai naapertorlugit allappoq. 

2020: 
 

  • Ruslandip Kinallu Issittumi najuunnerat USA-p aarleqqutigigaa, Amerikap Danmarkimi aallartitaa Carla Sands Altingetimut apriilip ulluisa 20-anni isumaliuutersuummini allappoq. USA nunatsinnut atassuteqalerusullunilu nunatsinni ineriartortitsinermi siuarsaaqataarusuttoq, taanna allappoq.
  •  USA 12,1 millionit dollarinik - 83 millionit koruunit missaannik - nunatsinni innuttaasut iluaqutigisinnaasaannik suliniutinut aningaasaliisoq, Namminersorlutik Oqartussat apriilip ulluisa 23-anni ilisimatitsipput.

- Uani pingaaruteqarpoq oqaatigissallugu, aningaasat taakku toqqaannaq landskassemut ikisussaanngillat. Tassa amerikamiut aqutassaraat. Amerikamiut inatsisartuisa taakku aalajangernikuuaat siunertanut tallimanut, sorlernut atorneqassanersut, Kim Kielsen taama oqarpoq.

AAMMA ATUARUK Nunarput USA-lu koruuninik millionilikkaanik nalilinnut suleqatigiissasut

Amerikamiut ilaatigut nunatsinni takornariaqarneq, aatsitassarsiorneq ilinniartitaanerlu aningasaliiffigaat.

Taamaaliorneq nunatsinniit politikerinit, Danmarkimi politikeriniit ilisimasalinniillu apeqqusernartoqartinneqarpoq. Taakkummi isumaqarput amerikamiut aningaasaliinermikkut soqutigisatik aallunniaraat.

Kim Kielsenilli erseqqissaatigaa aningaasat nunatsinnut iluaqutaasumik atorneqassasut, isertornaguli USA-p aningaasat tunniutiinnanngikkai.

- Kia aningaasaliissutigivaat? Amerikarmiut, taava tupinnassanngilaq taakku siunertanut tunngatillugu qulequttanut aalajangersimasunut ilumut atorneqassasut qulakkiissagaat. Tupinnartuliaanngilaq.

Nunarput pissaanilissuarnit allanit, soorlu Ruslandimit Kinamiillu sunnertiannginneroqqullugu aningaasat atorneqassasut, USA-p Danmarkimut aallartitaa, Carla Sands, oqarpoq.

AAMMA ATUARUK Carla Sands om aftale: Grønland skal være en stærk nabo til USA

Amerikap diplomatia Sung Choi USA-p nunatsinni sinniisoqarfiani sulisusaavoq. Taassuma USA-p nunatsinnut aningaasaliinini namminneq iluaqutigiumaaraa qularutiginngilaa. Taassuma oqarnera naapertorlugu nunatta USA-llu akornanni niueqatigiinnermut iluaqutaassangatippaa.

USA-lli aningaasaliinermigut nunatta nunanik allanik, soorlu Kinamut, niueqateqarnera sunnernavianngikkaa, Kim Kielsen oqarpoq.

- Naamik, uani akulerussorneqassanngillat. Aamma una oqaatigisariaqarpoq, uku massakkut isumaqatigiissutit 2020-21-lu tassani atuuppoq, taava tassani nalilersuisoqassaaq. Una alloriarnerinnaavoq siulleq, taava tassani nalilersorneqarumaarpoq ingerlaqqissaagut, immaqaluunniit naamik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat