Nunarput USA-lu koruuninik millionilikkaanik nalilinnut suleqatigiissasut

Nunatta USA-p aningaasaliissutiginiagai nuannaarutigalugit akueriniarpai.

Naalakkersuisut tusagassiuutinut taama nalunaaruteqarput.

Aningaasat pineqartut katillugit 12,1 millionit dollariupput - tassa danskit koruuninngorlugit 83 millionit koruunit, taakkualu ukioq manna aappaagulu atorneqartussaapput.

Suliaqarneq Naalakkersuisut qanimut suleqatigineratigut ingerlanneqassasoq, allassimavoq.

AAMMA ATUARUK Ilisimasallit: USA nunatta ikinngutinnaavini tulliujumalluni akiliisoq

Tassa aningaasat nunatsinnut toqqaannartumik nassiunneqartussat pineqanngillat.

Aningaasat amerikamiut ilisimatuuinit siunnersorneqarnikkut atorneqarnissaat naatsorsuutaavoq. Taakkulu isumaqatigiissutit pioreersut tunuliaqutaralugit atorneqarnissaat naatsoruutigineqarpoq.

Aningaasat suliniutinut aalajangersimasunut tapiissutaassapput. Tassalu suliniutit nunani arlariinnit akuerineqaraangata aatsaat aningaasat tunniunneqartassapput.

- Kalaallit Nunaata USA-llu akornanni suleqatigiinnerup annertusarneqarnera, Kalaallit Nunaanni suliniutinut USA-p aningaasaliineranik aalajangersimasumik kinguneqartoq pitsaasuuvoq, Naalakkersuisut siulittaasuat, Kim Kielsen (S) nalunaarummi oqarpoq.

Taassuma oqarnera naapertorlugu aningaasaliissutit nunat taakku marluk suleqatigiinnerannut iluaqutaavoq.

Suleqatigiinneq Naalakkersuisut amerikamiullu nunanut allanut tunngasunut ministereqarfiata 2019-imi juunimi isumaqatigiissutaata inerneratut ilaatigut takuneqassaaq.

AAMMA ATUARUK Aftale mellem USA og Grønland skal styrke mineralforskning

USA Nuummi sinniisoqarfik amerikamiut atorfilittaannik ataatsimik sulisoqartoq siorna maajimi ammarpaa. Sinniisoqarfiup 2020-mi arfineq-marlunnik sulisoqalernissaa pilersaarutaavoq.