USA-mut isumaqatigiissut aatsitassanut ilisimatusarnermut pitsanngorsaataassasoq
Aatsitassanut suliffeqarnermullu naalakkersuisoqarfiup USA-milu nunanut allanut tunngasunut ministereqarfiup paaseqatigiinnissamik isumaqatigiissut atorlugu Nunatta kujataa 3.000 kvadratkilometerit sinnerlugu annertussuseqartoq timmisartumit aasaanerani misissuiffigalugulu aningaasaliiffigissagaat tusagassiuutinut nalunaarummi allassimavoq.
Timmisartut Narsarsuarmut mittarlutik juulimi aggustimilu misissuissapput.
- Kalaallit Nunaat pisuussuteqaqaaq isumaqatigiissutikkullu tassuuna nukissiornikkut aatsitassarsiornikkullu periarfissat pitsaanerpaanngortinniarneqarput, pisortap tullia, Francis R. Fannon oqarpoq.
Nunatta USA-llu ilisimatuussutsikkut teknikkikkullu ilisimasanik paarlaasseqatigiinnissaq ukiorpassuarni suleqatigiissutigisaraat, Aatsitassanut suliffeqarnermullu naalakkersuisup, Erik Jensenip oqaatigaa.
- Isumaqatigiissutikkut tassuuna paasissutissanik katersineq qitiutipparput siunissami aatsitassarsiornermi toqqammaviusussaammat. Paasissutissat amerliartortillugit suut sukumiinerusumik misissuiffigineqarnissaannik naliliineq ajornannginnerujartussaaq, Erik Jensen oqarpoq.