Amerikamiut Danmarkimi aallartitaata, Carla Sandsip nunatsinnut aningaasaliineq USA-mut saniliusumik nukittorsaaniarnerusoq erseqqissaatigaa.Assi: Scanpix

Carla Sands isumaqatigiissut pillugu: Kalaallit Nunaat USA-mut saniliussaaq nukittooq

USA-p nunarput sanilitut pigissaarfiulluartutut qanigisatullu isigerusuppaa. Taamaammat Amerikap naalagaaffiat nunamut millionilikkaanik dollarsinik aningaasaliissuteqarpoq, amerikamiut Danmarkimi aallartitaat, Carla Sands oqarpoq.

- Kalaallit Nunaat sanileraarput. Nunatsinnit sanilerisagut siuariartortuunissaat isumannaatsuunissaallu kissaatigaarput.

USA-p aallartitaa, Carla Sands tusagassiortunik sisamanngornermi katersortitsinermi oqarpoq.

Katersortitsinermi tassani amerikamiut diplomatiat Nuummi sinniisoqarfissamiittussaq, Sung Choi aamma peqataavoq.

USA nunatsinni aatsitassarsiornermut, takornariaqarnermut ilinniartitaanermullu 12,1 millionit dollarsinik – tassa danskit koruuninngorlugu 83 millioninik aningaasaliiniartoq pisortatigoortumik sisamanngornermi saqqummersinneqarpoq. Aningaasat siunnersuinermut amerikamiullu suliniutaannut atorneqassasut, Naalakkersuisut paasissutissiipput.

AAMMA ATUARUK Tusarfiit KNR-imut: USA nunatsinnut 82 millionit koruuninik tapiissuteqarniartoq

Danskit naalakkersuisuisa ’tamakkiisumik tapersiineratigut’ isumaqatigiissuteqartoqartoq, Carla Sandsip erseqqissaatigaa.

Isumaqatigiissuteqarnikkut nunatsinni ineriartortoqarnermut siuarsaasoqarnissaa USA-p neriuutigaa.

- USA saniliisa siuariartornerisa isumannaatsumillu misiginerisa qulakkeernerat uatsinnut aamma iluaqutaassaaq. Taamaalillutik aamma uagut malittarisassatta assiginngisaannik ingerlariaaseqartunit pissaaneqartunit sunniiffigineqarnissamut suleqatigisaqalernissamullu aarlerinartorsiunnginnerussapput, Carla Sands oqarpoq.

Kinap Ruslandillu Issittumi iliuuseqarnissaat amerikamiut nunanut allanut tunngasunut ministeriata, Mike Pompeop aamma Carla Sandsip qasseeriarlutik mianersoqqussutiginikuuaat.

USA-p piumasaqaataanut erseqqissumik akissutissaqanngitsoq

Kalaallit danskillu politikeriisa USA-p nunatsinnut aningaasaliinissaminut qanoq piumasaqaateqarnera sapaatip-akunnerani matumani ernumanartoqarnerarpaat.

Naak sammisaq pillugu qassiinik apeqquteqartoqaraluartoq Carla Sandsip Sung Choillu Naalakkersuisut amerikamiullu nunanut allanut tunngasunut 2019-imi juunimi isumaqatigiissutigisaat taamaallaat innersuussutigaat.

Tassani nunatta USA-llu nunatsinni aatsitassanut suliaqarnermi suleqatigiinnissaat isumaqatigiissutigineqarpoq.

AAMMA ATUARUK Aaja Chemnitz Aki-Matilda Høegh-Damilu: Dollarsinut qujanaq – piumasaqaatilli naapertuuppata

USA-lli nunatsinni nalinginnaasumik ineriartortitserusunnera Carla Sandsip erseqqissaatigaa.

- Kalaallit Nunaannukaqqillunga takornariaqarnermi pilersitat, aalisarneq ineriartortoq aatsitassarsiorfinni suliaqartut inuillu tunineqartut takunissaat pissangagaara, taanna oqarpoq.

Carla Sands Sung Choi

Carla Sands aamma Sung Choi siorna Katuami. 

 

Kalaallit Nunaat pisuujusoq USA-mut aamma iluaqutissartaqartoq, Sung Choi ilanngussivoq.

- Soorunami soqutiginnippugut. Nunarsuarmi tamarmi diplomatitut tamanna suliassaraarput. USA-p Kalaallit Nunaatalu akornanni niuernerup annertusarsinnaalernissaanut immaqa Maine (USA-miittoq aaqq.) aqqutigalugu avammut niuertoqalersinnaaneranut periarfissat qilanaaraagut. Kalaallit Nunaannuunnaanngitsoq aammali amerikamiut suliffeqarfiutaannut periarfissarujussuarmik takusaqarsinnaavugut.

Amerikamiut illersornissamut sakkutooqarfiinut atassuteqanngitsoq

USA, Nunarput Danmarkilu amerikamiut Pituffimmi missilinut illersuutaasumik radarimik nutarsaanissaannik akuersissuteqarfiusumik Igalikumi 2004-mi isumaqatigiissuteqarput.

Tassunga taarsiullugu USA nunatsinni ineriartornermut ilaatigut kalaallit ilinniartitaaneranni, avatangiiseqarnermi susassaqarfimmi, silaannakkut angallannermi inuussutissarsiornermilu ineriartornermut suleqataasussanngorpoq.

USA-li isumaqatigiissummik naammassinnissimanngitsutut isornartorsiorneqarpoq. Naallu USA-p nunatsinnut millioninik neqerooruteqarnera Igalikumi isumaqatigiissummut tunngaveqanngikkaluartoq 83 millionit koruunit nunat akorninni ukiorpaalunni oqallisigineqartarsimasunut eqqarsaatigineqartut, Sung Choi-ip erseqqissaatigaa.

AAMMA ATUARUK Eksperter: USA betaler for at blive Grønlands næstbedste ven  

- Suliniutit taakku suliniutaasimasunut ukiorpassuarni illikartinneqarsimasut aallarniisuunissaannut periarfissaq isigivarput, Sung Choi oqarpoq.

USA-p nunatsinni sakkutooqarnerminik annertusaaniarnissani piumasaqaatigineraa toqqaannartumik apeqqutigineqarmat amerikamiut Danmarkimi aallartitaata ’naagga’ akissutigaa.

- Sakkutooqarfinnik nutaanik ammaanissaq pillugu Illersornissaq pillugu ministereqarfik oqaloqatigiissuteqarfigisimanagu oqaatigisinnaavara, Carla Sands oqarpoq.

AAMMA ATUARUK Dansk udenrigsminister: USAs aftale med Grønland er kun det første skridt

Naalakkersuisulli USA-p nunattalu ataatsimiittarnerini Pituffimmi kiffartuussinissamut isumaqatigiissutinik annaasaqarneq qaqittuarsimagaat, Carla Sandsip paasissutissiissutigaa. Isumaqatigiissulli nutaaq Pituffimmut attuumassuteqanngitsoq oqaatigaa.

Taamaakkaluartorli illersornissamut sillimaniarnermullu politikki isumaqatigiissummi pingaaruteqartoq oqaatigaa, tassanilu Kalaallit Nunaata, Islandip Tuluit Nunaatalu akornanni imaatigut aqqutit innersuussutigalugit.

- Rusland sineriammini sakkutooqarnikkut ukiuni kingullerni inerisaanikorujussuuvoq. Imaatigullu aqqutit taakku sakkutuulersunnginnissaat pingaaruteqarpoq, taamaalilluta ajornartoornermi suleqatigisatsinnut Atlantikup illuatungaaniittunut ornigussinnaassaagut, Carla Sands oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat