Tusarfiit KNR-imut: USA nunatsinnut 82 millionit koruuninik tapiissuteqarniartoq

12 millionit dollarsit – imaluunniit danskit koruuninngorlugu 82 millionit koruunit – amerikamiut naalakkersuisuinit nunatsinnut tapiissutigineqarsinnaapput.

Tamanna KNR-ip tusarfimmit USA-p nunatta Danmarkillu akornanni isumaqatigiinniarnermut ilisimannittumit tusarpaa.

Aningaasat nunatsinni takornariaqarnermut iluaqutaallutillu aatsitassaqarnermut ilaatigut atorneqassapput. Tamatuma saniatigut aningaasat ilaat ilinniartitaanermut matumani tuluttut ilinniartitsinermut atorneqartussanngortinneqassasut, KNR-ip tusarpaa.

AAMMA ATUARUK USA nunatsinnut aningaasanik tapiissuteqarniartoq

USA-mit aningaasatigut tapiissuteqarnissamut nalunaarut amerikamiut Danmarkimi aallartitaata, Carla Sandsip tusagassiuutini, Altingetimi allaatigisami saqqummersippaa.

Taassuma 'USA-p naalakkersuisui Kalaallit Nunaanni ineriartortitsinerup siuarsarnissaanut iluaqutaasinnaasunik aningaasarpaalunnik ikiorsiissuteqarnissartik pilersaarusiuleruttoraat' allappaa.

AAMMA ATUARUK Søren Espersen: USA-p Kalaallit Nunaat nikassarpaa

Tamatuma kingornatigut kalaallit danskillu politikeriisa USA-p sumik illuanit kissaateqarnera isornartorsiorpaluttumik apeqquserpaat.

KNR-ip paasissutissarsiarisai naapertorlugit naalakkersuisoqarnikkut maanna isumaqatigiinniartoqarpoq, sulialli politikkikkut inaarutaamik suliarinissaa suli amigaataavoq.

Naalakkersuisut pisortatigoortumik sapaatip-akunnerani matumani annerusumik saqqummersitsinissartik naatsorsuutigaat.