Søren Espersen: USA-p Kalaallit Nunaat nikassarpaa

USA-p Danmarkimi aallartitaata, Carla Sandsip, aallartitatut Kalaallit Nunaat siuarsagassaanerarlugu sassarnera ileqqorluttuliornerusoq, Dansk Folkepartip siulittaasuata tullia Søren Espersen isumaqarpoq.
Dansk Folkepartip siulittaasuata tulliata, Søren Espersenip, USA-p Danmarkimi aallartitaa Altingetimut isumaliuutersuuteqareersorlu isornartorsiorpaa. Assi © : Scanpix
apriilip 22-at 2020 05:58
Nutserisoq Hanne Petersen

USA-p Danmarkimi aallartitaata, Carla Sandsip, isumaliuutersuutini nittartakkakkut nutaarsiassaqartitsiviup Altingetip ataasinngornermi saqqummiutereeraalu inuttaa oqaaseqarumanngittuarsinnarpoq.

Amerikap Københavnimi aallartitaqarfia KNR-imut taama ilisimatitsivoq.

USA-p naalakkersuisuisa Kalaallit Nunaannut aningaasarpaalunnik ikiorsiissuteqarnissartik pilersaarusiuleruttoraat, Carla Sands isumaliuutersuummini allappoq, aningaasalli taakku sumut atorneqassanersut imaluunniit qanoq amerlatiginersut isumaliuutersuummini allannagu.

AAMMA ATUARUK USA nunatsinnut aningaasanik tapiissuteqarniartoq

Isumaliutersuutaa taassumalu imarisaa, Dansk Folkepartip siulittaasuata tulliata nunatsinnullu tunngasunik oqaaseqartartuata, Søren Espersenip, tupigusuutigeqaa.

- Nunamut siuarsagassamut Kalaallit Nunaatulli atugartuujusutulli ittuunngitsumut neqeroorutaarpalaarpoq. Tamanna eqqumiigeqaara, Søren Espersen oqarpoq nangillunilu:

- Orniguteriarluni ima oqarnertulli ippoq: 'Ata takusiuk. Ikioriartorlusi orniguppugut'.

USA-p aallartitaatut ileqqorluttuliornerusoq

Naalakkersuisut siulittaasuat, Kim Kielsen, nunanut allanut tunngasunut maanna akisussaasuugallartoq, KNR-imut tamanna pillugu aamma oqaaseqarumanngilaq.

Søren Espersenip oqarnera naapertorlugu USA-p Kalaallit Nunaannut aningaasanik tapiissuteqartussanngornera qanorpiaq imaqarnersoq, Amerikap aallartitaqarfiata erseqqissarsinnaannginnerarmagu eqqumiilluinnarpoq.

- Taamaaliortussanngorneq pilersaarnermik soorunami ilaqartarmat pilersaarutitik Kalaallit Nunaata inuinut minnerpaatut oqaluttuarisariaqarpaat, Søren Espersen oqarpoq.

- Amerikamiut taamaaliornerat paatsuunganarpoq. Taama oqartariaqarpunga, Søren Espersen oqarpoq.

AAMMA ATUARUK Danskit politikerii nunatsinnut aningaasatigut tapersiissuteqarneq pillugu: Eqqarsarluaqqaarlusi

Folketingetimi Venstrekkut aamma Radikale Venstrekkut nunatsinni politikerit USA-p aningaasanik tapiissuteqarsinnaanerminut paarlattuanik sunik piumasaqarumaarneranik eqqummaarinnilluarnissaannut kajumissaarpaat.

USA-p naalagaaffeqatigiinneq ajalusoortinniarsarigaa, Konservative Folkepartip nunatsinnut tunngasunik oqaaseqartartua Rasmus Jarlov isumaqarpoq.

USA Kalaallit Nunaanni susassaqarfinnut sorlernut tapiissuteqalersaarnersoq, Søren Espersenip erseqqissumik eqqoriarsinnaannginnerarpaa. Kisianni illersornissamut, isumannaallisaanermut nunanulluunnit allanut politikkinut tunngasunut tapiissuteqalersaarpat, tamanna Danmarkilu isumaqatigiissutigineqaqqaartussaasoq, taassuma erseqqissaatigaa.

- Suliassaqarfiit taakku naalagaaffeqatigiinnerup iluani isumagineqaqqaartussaapput, aatsaallu taamaaliortoqareerpat NATO aqqutigalugu isumaqatigiissuteqartoqarsinnaavoq. USA Kalaallit Nunaallu akornanni isumaqatigiissuteqartoqarsinnaanngilaq. Tamanna ajornarluinnarpoq, Søren Espersen oqarpoq.