Danskit politikerii nunatsinnut aningaasatigut tapersiissuteqarneq pillugu: Eqqarsarluaqqaarlusi
Amerikamiut aallartitaata, Carla Sandsip oqarnera naapertorlugu amerikamiut nunatsinni ineriartortitsinerup siuarsarnissaanut iluaqutaasinnaasunik ikiorsiissuteqarnissartik pilersaarusiuleruttoraat.
Tamanna nunatsinni nukissiuutinik ineriartortitsissasoq, Altingetimi allaatigisami taanna allaaserisaqarpoq.
De Konservativet oqarnerat naapertorlugu USA-p naalagaaffeqatigiinnut ”isertuanngitsorujussuarmik” qajannarsisitsiniarpoq. Venstreli akuersaarneruvoq, De Radikalellu akornanniilluni.
- Kalaallit Nunaannut Issittumullu soqutiginnittorujussuaqalerneranut isiginnittuuvugut, malinnaaniapiloornartorujussuullunilu, taamaalillutalu imminut naalagaaffeqatigiilluunniit annaassanngilarput, nunanut allanut tunngasunut oqaaseqartoq, Martin Lidegaard (R) oqarpoq.
Nunatsinni nukissiuutit ineriartortinneqarneranut nutarsaaneq
Amerikamiut Danmarkimi aallartitaat aviisimi allaatigisami Ruslandip Kinallu Issittumi suliaqarnerannut isornartorsiuillunilu aningaasaqarnikkut tapiissuteqarnissamik eqqaasaqarpoq.
- Danskit naalagaaffiat tamarmi Issittumi pilersitsinissamut aallartisaanissamut siuarsaaqatigerusupparput taamaalilluni Issittumi aningaasaqarnikkut attanneqarsinnaasumik ineriartortitsisoqassalluni.
AAMMA ATUARUK USA nunatsinnut aningaasanik tapiissuteqarniartoq
- USA-p naalakkersuisuisa Kalaallit Nunaanni ineriartortitsinerup siuarsarnissaanut iluaqutaasinnaasunik ikiorsiissuteqarnissartik pilersaarusiuleruttorpaat, Carla Sands allappoq.
Naalagaaffeqatigiinnut qajannarsisitsiniartoq
Kalaallit Nunaalli eqqarsarluartariaqartoq, nunanut allanut tunngasunut ministeriusimasoq, Martin Lidegaard mianersoqqusivoq.
- Amerikamiut aningaasanik tapiissuteqarniarlutik aalajangerunik tamanna illuatungaanit pissarsiaqarnissaminnik naatsorsuuteqarnerannik pissuteqarpoq. Tamanna Kalaallit Nunaata tigorusunnerlugu nalilertariaqarpaa, Martin Lidegaard oqarpoq.
Taassuma oqariartuutip qanoq ilaqarnera erseqqarinngimmat isummerfiginissaa suli ajornakusoortoq erseqqissaatigaa.
Venstre akuersaarneruvoq, Kalaallit Nunaannulli tunngasunut oqaaseqartartoq, Christoffer Melson qanoq isummernissamut aamma nangaassuteqarpoq.
- Kalaallit inuussutissarsiornikkut aningaasaliisussanut aningaasaqarnermillu ineriartortitsinissamut soqutiginnittut misigisimavakka, kisianni Kalaallit Nunaata tamanna qanoq suleqatigiifferusutsiginerlugu naggaterpiaani aalajangigassaraa, Christoffer Melson allalluni oqaaseqarpoq.
De Konservativeniilli Kalaallit Nunaat pillugu oqaaseqartartup Rasmus Jarlovip oqarnera naapertorlugu De Konservativet qularnerungaatsiarput.
- USA naalagaaffeqatigiinnut isertuanngitsorujussuarmik qajannarsisitsiniarpoq. Periarfissinneqartuarsimapput kisianni aamma killissaqarpoq, naggaterpiaanilu qaqitsinngikkunik Kalaallit Nunaanniissinnaanngillat,
- Akuersaarneqarsinnaanngilluinnarpoq, taanna Twitterikkut allappoq.