Aaja Chemnitz Aki-Matilda Høegh-Damilu: Dollarsinut qujanaq – piumasaqaatilli naapertuuppata
![](/sites/default/files/styles/image_934x467/public/article_images/aaja_aki_valgaften.jpeg?itok=7qay-x3Z)
USA-p nunatsinnut 82 millionit koruuninik aningaasaleerusunnera qujarupparput.
Kalaallit Folketingimut ilaasortaatitaat Inuit Ataqatigiinnit, Aaja Chemnitz Larsen Siumumiillu Aki-Matilda Høegh-Dam USA-p nunatsinni assigiinngitsunut 82 millionit koruuninik aningaasaliinissamik neqerooruteqarnera pillugu taama oqarput.
KNR-ip paasissutissarsiarisai naapertorlugit aningaasat takornarialerinermut, aatsitassarsiornermut ilinniartitaanermullu susassaqarfinnut agguaataarneqassapput.
Saqqummertut tunngavigalugit nunatta tamanna qujarutissagaa isumaqarpit?
- Aap, taama isumaqarpunga, Aaja Chemnitz Larsen oqarpoq nangillunilu:
AAMMA ATUARUK Tusarfiit KNR-imut: USA nunatsinnut 82 millionit koruuninik tapiissuteqarniartoq
- Susassaqarfiit marluk ukkatariniarneqartut ajunngilluinnartutut isigaakka. Susassaqarfiit inuussutissarsiornermi ineriartortitsineq ilinniartitaanerlu kalaallit isaanniit ajunngilluinnartuupput.
Inuit Ataqatigiinniillu politikerip nangaassuteqarani angernerunngilaq.
- Amerikamiut oqarput najuunneq sunniuteqarnerusoq. Taamaammat Nuummi sinniisoqarfimmik pilersitsipput aamma aningaasaliinikkut arlaatigut sunniuteqarnissartik nunatsinniissinnaatitaalernissartillu naatsorsuutigaat.
- Nunarput niuerutigineqaleqqunagu sumut akuersaassanerluni eqqarsaatigeqqissaartariaqarpaa, Aaja Chemnitz Larsen.
Taassuma USA neqerooruteqarnermigut soorlu Kinap USA-tut nunatsinni inuussutissarsiornerni akuliutinnginnissaanik naalakkersuinikkullunniit attaveqannginnissaannik piumasaqarsinnaasoq ilimagaa. Immaqaluunniit USA nunatsinni amerlanerusunik sakkutooqarfeqalerusussasoq.
Aki-Matilda: Suniarnersut takoriartigu
Siumup Folketingimi ilaasortaatitaata, Aki-Matilda Høegh-Damip, USA-p neqeroorutaa aamma akuersaarpaa.
Taanna Amerikap aallartitaata, Carla Sandsip sapaatit akunnerata matuma aallartinnerani isumaliuutersuutaa aallaavigalugu isumaqarpoq, nunarput USA-mi aningaasaateqarfinnut qinnuteqarsinnaalersinniarneqartoq.
- Nunarsuarmi aningaasaateqarfissuit annerpaartaasa ilaannut ammaanneqartugut takorlooqqaarpara. Taamaalinissaq siornatigut unammillernarsimavoq, Danmarkimi eqqarsaatigissagaanni aningaasaateqarfiit allat, soorlu Vækstfonden, nunatsinnut ukiualuinnaat matuma siorna aningaasaliissuteqarumanikuunngillat, Aki-Matilda Høegh-Dam oqarpoq.
AAMMA ATUARUK Ilisimasallit: USA nunatta ikinngutinnaavini tulliujumalluni akiliisoq
Nunattali USA-p piumasai eqqummaariffigissagai, taassuma ilanngullugu oqaatigaa.
- Nuna sorliugaluarpalluunniit apeqqutaatinnagu suleqativut mianersuuttussaavagut. Mianersortuartariaqarpugut.
Aki-Matilda Høegh-Damili Aaja Chemnitz Larsen akerlilerlugu isumaqarpoq, nunarput USA-mit taperneqassaguni assersuutigalugu Kinamik niueqatigiinninnissaq pillugu isumaqatigiissusiunnginnissaanik piumasaqarnavianngitsoq.
USA-mmi aningaasaliiniarnera nunarsuarmiut eqqisseqatigiinnerannik attassinissamik aallaaveqarpoq, Aki-Matilda Høegh-Dam oqarpoq.
- Kinap nunatsinni aatsitassarsiulinnginnissaa, USA-p pingaartippaa. Tamanna USA-p naleqartitaanut pingaaruteqarpoq. Tamannali niuernermut sunniuteqangaarnavianngilaq. Taamaattoqassappalli isumaqarpunga, USA-lu isumaqatigiissuteqarsinnaanavianngitsugut, Aki-Matilda Høegh-Dam oqarpoq.
USA-lu isumaqatigiissut sisamanngorpat ullup ingerlanerani saqqummiunneqassasoq naatsorsuutigineqarpoq.