Kim Kielsen: Qineqqusaarneq allaanerungaatsiartoq
Kim Kielsen qineqqusaarnerit siuliini politikerit allat assigalugit saqqumingaatsiarpoq. Naalakkersuisut siulittaasuat qineqqusaarnermi matumani tv-kkut ataasiarluni qineqqusaartinneqarpoq.
Kim Kielsen maanna Siumumi siulittaasuunngilaq, qineqqusaarnermilu tamanna maluginiarpaa.
AAMMA ATUARUK Ilisimatooq siulittuisoq: Isumaqatigiinngitsut naapeqatigiissapput
- Uani malunnartupilussuugami pisut assigiinngitsut. Siulittaasussarsiornerup kingorna qanoq pisoqartoq. Tassa taanna ersarissumik oqariartuutigisariaqarpara, Siumumi ataatsimoortariaqarpugut. Ajugaasariaqarpugut massakkut qinersinermi, innuttaasunut aamma takutittariaqarparput ataatsimoornerput.
- Taava innuttaasut taasinermikkut kina Siumumi siulittaasussatut arlaatigulluunniit, naalakkersuisut siulittaasussatut innersuunneqassanersoq tassani takutikkumaarpaa amerlanerussuteqassagutta.
Tv-kkut qineqqusaanngitsiarnerani peersitaasoq
Kim Kielsen tallimanngormat tv-kkut qineqqusaarnissaminut akunnialuinnanngortut, Siumumi siulersuisuunernit peersinneqarluni Facebookiminut oqaatigaa.
- Soorunami ippinnalaarpoq, kisianni ippassaq sassartut aamma ajunngillat.
Siumumi siulittaasup tullia Vivian Motzfeldt KNR-imit oqaloqatigaarput. Taassuma nassuiaanera naapertorlugu Siumumi qinigassanngortittut nukiit nutaat saqqummiunneqarnissaat peqqutaalluni, Kim Kielsen peerneqartariaqarsimavoq.
AAMMA ATUARUK Qinersinissamut oqallinneq: Partiit nunatsinni aatsitassarsiorneq ima ineriartortikkusuppaat
- Inunnut ataasiakkaanut tunngassuteqanngilaq, kisiannili Siumut tamarmiusup ataasiusup aamma sassartitani nutaat piukkunnarluartut taakku nuisinneqarnissaat pingaartissimavaa.
Siumumi isumaqatigiinnginneq qinersinermut sunniuteqarsinnaasoq
Nutaarsiassaqartitsivik Sermitsiaq inuit isumaanni isumasiuineranni nutaami, Siumut qinikkamik ataatsimik annaasaqassapput, Inuit Ataqatigiillu sisamanik siuariaateqassallutik.
Siumut siuttunngussagaluarpat kina pissaaneqartussatut inississanersoq innuttaasunit nalornisigineqarneranik peqquteqaratarsinnaavoq. Ilisimatusarfimmi inuiaqatigiilerinermi ilisimatooq, Rasmus Leander taama naliliivoq.
- Erik Jensenip, nammineq siuttuunerminik oqariartuuteqangaatsiarpoq, Kim Kielsenili akerliani oqariartuuteqarpoq, tassa siuttussaq innuttaasunit aalajangerneqassasoq, taanna nassuiaavoq imalu itisiliilluni:
AAMMA ATUARUK Qinersinissamut oqallinneq: Partiit nunatsinni aatsitassarsiorneq ima ineriartortikkusuppaat
- Siumup iluani pissaaneqarniunneq suli annertuvoq. Taamatullu suli inissisimallutik qineqqusaarnerat qinersinermut qinersinereernerullu kingunissaanut pitsaavallaanngilaq, tassami Siumukkunnut taasisussat suut siunnerfigineqarnersut paatsiveerusimaassutigisinnaammassuk.
Inatsisartunut apriilip arfernani qinersisoqassaaq.