Ilisimatooq siulittuisoq: Isumaqatigiinngitsut naapeqatigiissapput
Inuit Ataqatigiit Inatsisartunut qinersinermi qaqutigoortumik inissisimalluarput.
Tamanna nittartakkatigut nutaarsiassaqartitsivup, Sermiatsiap HS Analyse suleqatigalugu misissuinerata takutippaa.
Misissuinermimi innuttaasut 36 procentiisa Inuit Ataqatigiit qinerniaraat takutippaa, taamaalillunilu partii aqqaneq-marlunnik qinigaatitaqalertussaarpasilluni.
Atassut: Marts 2021, 2 - april 2018, 2
Demokraterne: Marts 2021, 4 - april 2018, 6
Inuit Ataqatigiit: Marts 2021, 12 - april 2018, 8
Naleraq: Marts 2021, 5 - april 2018, 4
Siumut: Marts 2021, 8 - april 2018, 9
Nunatta Qitornai: Marts 2021, 0 - april 2018, 1
Suleqatigiissitsisut: Marts 2021, 0 - april 2018,1
Tusarfik: Sermitsiaq.ag
Qinersineq taama inerneqassappat Inuit Ataqatigiit ikinnerpaamik qinikkanik 16-inik Naalakkersuisunngortussanillu tulliinik katiteriniarsarissaaq.
AAMMA ATUARUK Nuummi marlunngorpat taasissavit? Taamaappat qanermut assiaquteqarnissaq innersuussutaavoq
Tamanna Inuit Ataqatigiinnut arlalinnik periarfissaqarfiussasoq, Ilisimatusarfimmi inuiaqatigiilerinermut ilisimatooq, kisitsisinik misissueqqissaarsimasoq, Rasmus Leander oqarpoq.
Qanorluunniillu pisoqaraluarpat ataaseq qulakkeeqqavoq:
- Naalakkersuisoqatigiillu qanorluunniit inissikkaluarpata saqqumilaanngitsunik isumaqatigiittoqarlunilu isumaqatigiinngitsunik naapeqatigiittoqassaaq, Rasmus Leander oqarpoq.
Naleraq, Siumut aamma Demokratiit katitertakkanik katiterisinnaasut
Taassuma Naleraq, Siumut Demokraatillu naalakkersuisoqatigiissinnaanerarpai.
- Taakku pingasut assigiinngitsumik katiterneqarsinnaapput imaluunniit partiit amerlanerusut ilaatinneqarsinnaallutik. Tamanna Kalaallit Nunaanni aamma ileqquuvoq. Maannali Inuit Ataqatigiit Nalerarlu ilismanarnerpaapput, katinnermili tassani aamma ajornartorsiuteqassaaq.
Isumasiuineq naapertorlugu Naleraq tallimanik qinigaatitaqartussaarpasippoq:
Misissuineq naatsumik:
* Misissuinermi inuit 706-it sianerfigineqarlutik misissuinermi peqataapput.
* Taakku nunatsinni sumiiffinnit tamaneerput aamma suiaassusaat, najugaat ukiuilu siammasissuullutik.
* Kisitsisitigut qularnartua 2,8 procentitut missiliorneqarpoq.
Paasissutissarsiffik: Sermitsiaq.ag
- Kuannersuarni aatsitassarsiornissamut suliniummut atatillugu isumaqatigiinngaatsiarput kisianni, namminiilivinnermut aamma aalisarnermut atatillugu taama isumaqatigiitsiginngillat, inuiaqatigiilerinermut ilisimatooq oqarpoq.
AAMMA ATUARUK Isumasiuineq: IA siuariangaatsiartussatut isikkoqarpoq
Allatut inissinneq Leanderip oqaatigisaa tassaavoq Siumut Inuit Ataqatigiillu IA-p siuttuuffigisaani naalakkersuisoqatigiilernerat. Tamannali ”ilisimanarpallaanngitsoq” oqaatigaa.
Isumasiuinerit naapertorlugit Demokraatit aamma kinguariartussaarpasipput, taakkulu sisamanik qinigaatitaqartussaarpasillutik, Rasmus Leanderilli nunatta kujataani Kuannersuarni aatsitassarsiornissamik suliniut oqallisaasoq pillugu apeqqut uani aporfiussanerarpaa.
Inuit Ataqatigiinnummi qinersineq suliniummut uniffiliinissamut taasinerussaaq, Demokraatillu suliniummik ingerlatitsiinnarusullutik.
- Inuit Ataqatigiinnit politikerit tamangajammik unneqqarillutik akissutaat tassaassaaq tassunga nikeriaqqittoqassanngitsoq, Rasmus Leander itisiliivoq.
Isumasiuinerit Siumumik siusinnerusukkut ilippaginnissimanngitsut
Siumup naalakkersuisuutitaqarnissaanut tunngatillugu isumasiuinerit malillugit inerneqartuaannanngitsoq oqaluttuarisaanermi takutinneqareernikuuvoq.
Qinersinerni kingullerni marlunni tassa 2014-imi 2018-imilu Inuit Ataqatigiit qinersinermi taaguunneqarnerpaanissaat isumasiuinermi aamma takutinneqarnikuuvoq, tamannali eqquutinngilaq.
- Taamaammat upperivallaartariaqanngilaq, Rasmus Leander oqarpoq.
- Qanoq inissisimanitsinnut missiliuinertut, naleqqatut takussutissatullu takutinneqarsinnaavoq. Isumasiuinerli ataasiinnaq naapertorlugu inerniliingaatsiartoqanngisaannassaaq.
Isumasiuineq ippassaq saqqummiunneqartoq naapertorlugu Siumut arfineq-pingasunik qinigaatitaqartussaarpasippoq.
Siumut Naalakkersuisuni Namminersorlutik Oqartussat 1979-imili eqqunneqarneranit siuttuuginnangajaavinnikuuvoq. Taamaallaat Inuit Ataqatigiit 2009-mit 2013-imut Naalakkersuisunut siulittaasuuvoq.
