Nuummi marlunngorpat taasissavit? Taamaappat qanermut assiaquteqarnissaq innersuussutaavoq
Aqerluusat 20.000-t qanermullu assiaqutit 10.000-t.
Taakku Kommuneqarfik Sermersuumi marlunngorpat taasinermi atugassatut pisiaapput.
Aqerluusaq taasissutigereerukku corona pillugu malittarisassat malillugit annississavat – Inussivimmullu taasiartorlutit isertinnak qanermut assiaqutilernissat innersuussutaavoq.
Coronamik nunatsinni maannamut qaammat ilivitsoq tunillatsissimasoqanngilaq. Taamaakkaluartoq corona pillugu killilersuinerit suli atuupput, inuillu illup iluani katerittut 100-nit amerlaneroqqusaanngillat.
Kommuneqarfik Sermersuumi illoqarfiit amerlanerpaartaanni tamanna ajornartorsiutaanavianngilaq, Nuummili taasiartorlutik katerittut 100-nit ilaannikkut ikinnerusarnavianngitsuunngillat.
Taamaammat Inussivimmi inersuaq immikkoortunut tallimanut tamarmik immikkut inunnit 100-nit kateriffiusinnaasunut agguataarpoq. Tassa imaappoq, Inussivik taasiartortunut 500-nut ataatsikkut inissaqassaaq – tamannalu inuit illumi katerittut amerlassusissaannut killiliussanit sisamariaammik qaangiineruvoq.
Corona pillugu allattoqarfik taamaaliornissamut akuersisuuvoq – taasiartortulli Inussiviup isaariaani agguaassanik isertigatik qanermut assiaquseqqaarnissaat innersuussutaassasoq, Kommuneqarfik Sermersuup attaveqaqatigiinnermut pisortaa Lars Damkjær KNR-imut ilisimatitsivoq.
Aqerluusat taasissutigereerannni anninneqartartussat. Assiliisoq: Christina Heilmann Rasmussen
Kommune Qeqertalimmi Avannaata Kommunianiluunniit qinersiviit taasiartortunit 100-nit amerlanerusunik isersimasoqarsinnaanissaannut akuersisimanatik, allattoqarfinni pisortat ilisimatitsipput.
Illoqarfinnilu allani qinersiviit taasiartortunit 100-nit amerlanerusunik isersimasoqarsinnaaneranut akuersissuteqartoqarsimaneranik, Namminersorlutik Oqartussat Nunamut Namminermut Immikkoortortaqarfianni pisortaq qinersinissamullu piareersarnermi akisussaasuusoq, Klaus Georg Hansen, tusagaqarsimanngilaq.
Nuummilu allattoqarfimmi pisortaq, Christina Heilmann Rasmussen, Inussivimmi taasinissamut piareersarnermi sunut tamanut akisussaasuuvoq:
- Inussivimmut apuukkuit isaariaanukassaatit. Tassani assannut bakteriaajaateqassaaq. Assatit bakteriaajareerukkit immikkoortunut tallimanut agguataarsimasumut inersuarmukassaatit, taanna oqarpoq.
- Assannut bakteriaajaaterpassuit, qanermut assiaquterpassuit aaqqatillu ataasiannagassarpassuit pisiarereerpagut. Tunuleriiaartoqaqqunagulu taasiveerassat aamma ilavagut, taakkulu katillutik 24-ussapput.
Taasiveerassat bakteriaajarneqallattaartassasut, taanna oqarpoq.
Aamma Tasiilami Paamiunilu qinersivissat pisarnermit anginerussapput.
- Eqqissisimalluinnarpunga. Corona pillugu malittarisassat naapertorneqarnissaannut sapinngisamik iliorpugut, Christina Heilmann Rasmussen oqarpoq.
Inussivik ullaakkut nalunaaqutaq qulingiluaniit unnukkut nalunaaqutaq arfineq-pingasut tungaanut ammassaaq.
- Inatsisartunut, kommunimut, ilagiit sinniisaannut nunaqarfinnilu aqutsisunut marlunngorpat apriilip ulluisa arfernanni qinersissaagut.
- Nunatsinni qinersivissat katillutik 72-iupput.
- Taasivissat Nuummiit nassiussat apuuffissaannut ullut unnuallu qulit iluanni tikiunneqarput.
- Ulloq qinersiffissaq sioqqullugu allakkatigut qinersisoqassasoq nunatsinni taasisinnaatitaasunut tamanut kaammattuutigineqarpoq. Coronamik nunatsinni qaammat ilivitsungajak tunillatsissimasoqanngikkaluartoq coronallu nunarsuaq tamakkerlugu tuniluunnnerata ajornartoortitsinera peqqutaalluni taamaaliortoqarpoq.
- Qinersivissat ullaakkut nalunaaqutaq qulingiluaniit unnukkut nalunaaqutaq arfineq-pingasut tungaanut ammassapput.
- Nunatsinni innuttaasuni taasisinnaatitaasut 41.000-t missiliorpaat.
- Inatsisartunut ilaasortanngortussatut qinikkat 31-usarput. Inatsisartunut qineqqusaartut 189-iupput.
- Kommuninut ataasiakkaani tallimaasunut qineqqusaartut katillutik 254-iupput.
Erseqqissaaneq: Kommuneqarfik Sermersuup KNR-imut ilisimatitsissutigineqartutulli anersaartuutinut assiaquteqaqqusineq ilisimatitsissutigineqarsimasutulli peqqussutaanavianngitsoq arfininngornermi ualikkut paasissutissiissutiggaa. Innersuussutaannaasorli attaveqatigiinnermut pisortaq, Lars Damkjær paasissutissiivoq.
