Isumasiuineq: IA siuariangaatsiartussatut isikkoqarpoq
Inuit Ataqatigiit Inatsisartunut apriilip ulluisa arfernanni qinersinermi siuariangaatsiartussatut isikkoqarput.
HS Analyse nutaarsiassaqartitsivillu Sermitsiaq.AG. suleqatigiillutik isumasiuneranni nutaami tamanna erserpoq.
Isumasiukkat 36 procentiisa IA qinerniaraat, isumasiunermi tassani erserpoq. Tassa IA procentinik qulinik siuariartussatut isikkoqarpoq.
IA arfineq-pingasunik maanna Inatsisartuni ilaasortaatitaqarpoq. IA aqqaneq-marlunnik Inatsisartuni marlunngorpat qinersereernermi ilaasortaatitaqalissasoq, isumasiunermi erserpoq.
Isumasiunerlu Siumumut nutaarsiassatsialaanngilaq. Partiimi taanna naalakkersuisuutitaliusoq marlunngorpat qinersinermi taasisut 23,2 procentiinik qinersiseqassasoq, isumasiunermi erserpoq.
Taamaattoqassappat 4,1 procentinik kinguariassaaq, tamannalu Siumut qulingiluanik Inatsisartuni ilaaasortaatitaqarunnaarluni arfineq-pingasuinnarnik ilaasortaatitaqalerneranik kinguneqassaaq.
Tassa imaappoq, Siumut 1979-imi Namminersornerullutik Oqartussaqalerneraniit aatsaat taama ikitsigisunik Inatsisartuni ilaasortaatitaqalerataannaasoq, Sermitsiaq.ag. allappoq.
IA siuariartussatut aamma februaarimi isikkoqartoq
IA siuariassasoq Siumullu kinguariassasoq, kingullermik tassa februaarimi isumasiunermi erserpoq. Siumut qulinik Inatsisartuni ilaasortaatitaqarunnaarluni qulingiluanik ilaasortaatitaqalissasoq, isumasiunermi tassani erserpoq.
Isumasiuineq taanna Inatsisartunut qinersinissaq suli suaarutigineqanngitsoq februaarimi pivoq.
Siumukkormiut taamanikkut assoralisimaartorujussuupput. Siumup taamanikkut siulittaasua, Kim Kielsen, parteeqataata partiip nuna tamakkerlugu ataatsimeersuarnerani uppisereeraallu, Erik Jensen siulittaasunngorpoq.
AAMMA ATUARUK Erik Jensen Siumumi siulittaasunngortoq
Jensen 35-nik qinersiseqarpoq, Kim Kielsenilu 29-nik qinersiseqarluni. Partiilu nutaanik aamma siulittaasuuneqalerpoq.
Kim Kielsen naalakkersuisut suli siulittaasoraat, Erik Jensenili naalakkersuisunut siulittaasunngorusuppoq. Taamaattoqassanersoq marlunngorpat qinersereernermi paasinarsissaaq.
IA ataasiaannarani siuttunngortussatut siornatigut isumasiunerni aamma isikkoqartarpoq.
IA siuariartussatut 2018-imi 2014-imilu isumasiunerni aamma isikkoqartartoq
Inuit Ataqatigiit partiini annerpaanngussasoq, Inatsisartunut kingullermik tassa 2018-imi apriilimi qinersinissamut tunngatillugu isumasiunermi aamma erserpoq.
IA qulinik Siumullu qulingiluanik Inatsisartuni ilaasortaatitaqalerataannaasut, Sermitsiap KNR-illu isumasiuneranni erserpoq.
Taamaakkaluartoq Siumut taamani qinersinermi ajugaavoq.
Inuit Ataqatigiit partiini annerpaanngussasoq, Inatsisartunut 2014-imi novembarimi qinersinnginnermi isumasiunermi aamma erserpoq.
AAMMA ATUARUK IA partiit anginersarilissavaat
Isumasiukkat 36,9 procentiisa Inuit Ataqatigiit qinissanerarpaat.
29,3 procentiisalu Siumut qinissanerarpaat.
Siumulli siornatigut qinersinerni ajugaasarmat, Inuit Ataqatigiit partiini annerpaanngunngitsoortarpoq.
Siumut 1979-imi Namminersornerullutik Oqartussaqalerneraniilli naalakkersuisuni siulittaasuutitaqartuaannangajassimavoq. Inuit Ataqatigiit naalakkersuisunut 2009-imiit 2013-imut taamaallaat siulittaasuutitaqarnikuuvoq.
