Assi: Epinion/KNR

ISUMASIUINEQ IA partiit anginersarilissavaat

Inuit Ataqatigiit Inatsisartunut qinersinermi partiit anginersarilissavaat, qinersisartut isumaannik misissuinerup nutaap tamanna takutippaa. Siumut kinguariangatsiassaaq.

Novembarip 28-ani qinersinermi Naalakkersuisut allanngornissaat ilimanaateqartoq, Epinionip KNR aamma Danmarkip Radioa sinnerlugit qinersisartut isumaannik misissuinerata nutaarluinnaap tamanna takutippaa.

Inuit Ataqatigiit novembarip 28-ani qinersinermi nunatsinni partiit anginersarilissavaat. Epinionip qinersisartut isumaannik misissuinera malillugu tamanna erserpoq.

Nunarput tamakkerlugu inuit katillugit 731-t Inatsisartunut qinersinermi qanoq qinersiniarnersut aperineqarsimapput. Misissuinerlu naapertorlugu apersorneqartut 36,9 procentiisa Inuit Ataqatigiit qinerniarpaat. Partii taamaalilluni 2013-imi qinersinermut naleqqiullugu procentinik marlunnik siuariaateqassaaq.

Misissuinerlu naapertorlugu, Siumut qinersinermut kingullermut naleqqiullugu malunnaatilimmik kinguariassaaq. Partii taamani qinersisut 43,2 procentiinit qinerneqarpoq, qinersinermili matumani Siumumik qinersiniartut 29,3 procentiinnaassasut misissuinerup tamanna ersersippaa - tassalu 14 procentinik kinguariaateqassalluni.

Qinersisartut taamaalillutik Sara Olsvigip Naalakkersuisunut siulittaasunngornissaa kissaatigaat. Apersorneqartummi toqqaannartumik aperineqarnerminni 41 procentiisa Naalakkersuisut siulittaasussaattut taanna piukkuppaat, 26 procentillu Kim Kielsen Naalakkersuisut siulittaasussaattut piukkullugu. Aperineqartullu 14 procentiisa taakku arlaannaalluunniit nunatta siuttussaatut piukkunnagit akisimapput.

 

Partii Naleraq qinerneqarluassaaq

Partiit sinnerinut tunngatillugu Partii Naleraq nukittunersaalluni inissisimavoq 14, procentinit qinerniarneqarluni, tulliuppullu Demokraatit 9,6 procentinit qinerniarneqartut. Atassut 5,7 procentinit qinerniarneqarpoq partiilu qinersinermi kingullermi aalajangiisuusoq - tassalu Partii Inuit - qinersisartut 2 procentiinit taamaallaat qinerniarneqarluni.

 

Epinionip isumasiuinera pillugu paasissutissat

  • Isumasiuineq Nunatsinni innuttaasut 731-t nalaatsornerinnakkut toqqakkat apersorneqarnerinik toqqammaveqarpoq.
  • Paasissutissanik katersuineq piffissami novembarip arfernanit 17-ianut ingerlanneqarpoq. Apersuisut marluinnik oqaaseqartuupput apersorneqartullu kalaallisut danskisulluunniit akissuteqarnissaminnut periarfissinneqarlutik. Apersorneqartut 87 %-ii kalaallisut akissuteqarput 13 %-illu danskisut akillutik.
  • Oqarasuaatit normui atorneqartut TelePostimit pissarsiarineqarput, tassaallutillu oqarasuaatit nalinginnaasut, angallattakkat aammalu Tusassillit normui.
  • Kisitsisitigut paasissutissat nangaanartoqassusiat  annerpaamik +/- 3,6 procentiuvoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat