Kim Kielsen USA-mi qinersineq pillugu: Silap pissusia sillimaniarnerlu pingaartippavut
- Tappiitsuusaassanngilagut, russit maannakkut annertusaapput ilaatigut Issittumi mittarfissualiorlutik. Aamma tupinnanngitsumik amerikap taanna sillimaffiginissanut tunngatillugu iliuuseqarusuppugut.
Kim Kielsen taama oqarpoq.
Issittup sikuerukkiartornera ilutigalugu nunatta imartaani angallattoqarnerulissaaq. Taamaammat sillimaniarneq annertusarneqartariaqartoq Kim Kielseni nassuiaavoq.
AAMMA ATUARUK ATAATSIMUT ISIGALUGU: Biden suli siuttuuvoq - Trumpili qinersinermi naligiiffiusartuni pingaaruteqartuni ajugaasoq
Taasumalu erseqqissarpaa, nunarput Danmarkimik naalagaaffeqateqarnikkut illersornissaq pillugu suleqatigiiffimmut NATO-mut ilasortaasoq.
- Nunatsinnut atugassarititat pitsaanerpaat sulissutigisariaqarpagut. Attaveqaatit taakku assigiinngitsut aqqutigalugit ersarissarneqartassapput amerikami naalakkersuisut siulittaasuat kinaagaluarpalluunniit.
Trumpip NATO-llu suleqateqarniarnerat aaqqiagiinngiffioqaaq. NATO-mi ilaasortat ilaasortaanerminnut tamakkiisumik akiliisarnissaat Trumpip uteriiserfiginikuuaa. Danmarki ilaasortaanerminut tamakkiisumik akiliineq ajortunut ilaavoq.
Silap pissusia Trumpilu
Donald Trumpip silap pissusiata allanngoriartornera inunnit pilersitaasoq upperinagu aamma oqaatigisareerpaa. Taammaammat USA silap pissusiata allanngoriartornerata akiorniarneqarnissaa pillugu Parisimi isumaqatigiissummit ilaasortaajunnaartinnikuuaa, nunat tamalaat akornanni suleqatigiinnermi angusarissaarutitut oqaatigineqartaraluartoq.
Donald Trumpilu Præsindentimut qinigaaqqissappat USA isumaqatigiissummut peqataaqqilernavianngitsoq Kim Kielsenip ilimagaa.
- Taamaattorli uagut akisussaaffeqarpugut annertuumik qisuariaateqassalluta. Qanimut suleqatigaavut aamma issittumi silaannaap kissatsikkiartornera marloriaammik sukkanerusumik eqqugaasarpugut. Tamakku ersarissartariaqarpagut, Kim Kielsen taama oqarpoq.
USA-p Parisimi isumaqatigiissummut ilannguteqqinnissaa Joe Bidenip angorusuppaa.
AAMMA ATUARUK Trumpip Bidenillu ajugaanissartik tamarmik ilimagigaat
USA Naalagaaffiit Peqatigiit peqqissuunissaq pillugu suleqatigiiffianit WHO-mit aamma aappaagumit ilaasortaajunnaarsinniarpaa.
Joe Bidenilu Præsidentimut qinigaassaguni taamaaliorniarneq unitsinniarlugu oqaatiginikuuaa.
Amerikap peqqissuunissaq pillugu suleqatigiiffiiginnarnissaa Kim Kielsenip neriuutigaa.
- Amerikap nunarsuarmi peqqinnissaqarnermut kattuffiussuit nualluummut akiuiniarnermut tunngatillugu ilannguteqqinniissaanut amerikap nalilersortariaqassagaa naatsorsuutigaara. Taanna pingaartupilussuuvoq aamma oqaatigissallugu.
