Trumpip Bidenillu ajugaanissartik tamarmik ilimagigaat
Nunatta nalunaaqutaa naapertorlugu 02.40 Demokraatit præsidentimut qinigassanngortitaat, Joe Biden nulialu Jill Biden naalagaaffimmi naalagaaffeqatigiinni ilaasumi Delawaremi oqalugiarput.
Taassuma Demokraatit præsidentip illorsuaniileriartortut qularutiginngivillugu oqaatigaa.
- Inissisimaffipput iluaraarput, Biden oqarpoq.
- Iluarivipparput. Unnuk manna qinersinermi ajugaanissarput ilimagaara.
AAMMA ATUARUK ATAATSIMUT ISIGALUGU: Biden suli siuttuuvoq - Trumpili qinersinermi naligiiffiusartuni pingaaruteqartuni ajugaasoq
Taassuma qinersisuni naammagittarluaqquai. Tamanna naalagaaffiit qassiiusut inernerisa suli ersarinnginnerannik pissuteqarpoq.
Naalagaaffiit qassiiusut – ilaatigut qinersinermi naligiiffiukannertartup pingaaruteqartup, Michiganip taasinerit pingasunngornerup ingerlanerani aatsaat kisinneqareerumaartut paasissutissiissutigaat, aamma qinersinermi pingaaruteqartut allat marluk, Pennsylvaniap aamma Wisconsinip kisitsineq ullunik sivisussuseqarsinnaanerarpaat.
- Qinersisoq kingulleq kisinneqarsimalertinnagu naammassinavianngilaq. Qinersinermi allagartat tamarluinnarmik, Biden oqarpoq.
Trump aamma ajugaasutut imminut oqaatigivoq - qinersinermili peqquserluuteqartoqarsoralugu
Bidenip oqalugiarnerata nalaani præsident Trump Det Hvide Husimi Twitterikkut Republikanerit ”ajugaarujussuassasut” allagaqarpoq.
Tamatuma saniatigut Biden qinersinermik ”tillinniarsarisutut” pasillugu oqaasertalerpaa.
Nunatta nalunaaqutaa malillugu nalunaaqutaq 04.20 Trump Det Hvide Husimi oqalugiarpoq, tassanilu ajugaanissani qularutiginagu nalunaaruteqarluni. Tamanna Republikanerit naalagaaffinni angisuuni soorlu Floridami Texasimilu ajugaanerata kingornatigut pivoq.
Tamatuma saniatigut kisitsineq Eqqartuussiviit qullersaanit ikiorneqarnikkut unitsinniarlugu kalerriutigalugu.
Nunatta kitaata nalunaaqutaa malillugu nalunaaqutaq 04.30 Trump 213-inik taasisussaqarpoq. Bidenilu 238-nik taasisussaqarluni.
Præsidentip illorsuani allaffeqalersinnaajumalluni taasisussanit amerlanerussuteqartunit tassa 270-init taaneqarsimasariaqarpoq.
Qinersinermi naligiiffiukannertartuni angisuuni qassiiusuni taasinerit kisinneqarnissaat suli amigaataapput. Qinersinermi naligiiffiukatannertartut naalagaaffiupput naalagaaffeqatigiinnut ilaasut, qinersinerillu siusinnerusut qinersisartut siumut præsidentinngortikkusutaminnik taasereerneq ajortut takutinnikuuaat.
