ATAATSIMUT ISIGALUGU: Biden suli siuttuuvoq - Trumpili qinersinermi naligiiffiusartuni pingaaruteqartuni ajugaasoq
Nutaarsiassaqartitsiviup AP-p missiliutigigallagaata republikanerinit præsident Donald Trump 213-nik taasisussaqarpasippoq demokraatinit Joe Biden 238-nik taasisussaqarluni siuttuuvoq.
Naalagaaffippaaluilli – ilaatigut qinersiviit naligiiffiusartut pingaaruteqartut Florida aamma Texas suli amigaataapput.
Taasinerit kisinneqarnerisa naammassinissaat qinersinermi matumani siusinnerusukkut qinersisarnermit sivisunerusumik kisinneqarnissaat naatsorsuutigineqarpoq. Tamanna coronamik nunarsuaq tamakkerlugu tunillaassuuttoqarnerata kingunerisaanik nalinginnaanngitsumik allakkatigut taasisut amerlangaatsiarnerannik pissuteqarpoq, allakkatigullu taasinerit qaqugukkut kisinneqassanersut naalagaaffimmiit naalagaaffimmut assigiinngillat.
Donald Trump ukunani maanna ajugaassangatinneqarpoq:
Kentucky, West Virginia, South Carolina, Alabama, Mississippi, Oklahoma, Tennessee, West Virginia, Arkansas, Indiana, North Dakota, South Dakota, Wyoming, Louisiana, Nebraska, Kansas, Ohio, Iowa, Montana aamma Texas.
Joe Biden ukunani maanna ajugaassangatinneqarpoq:
Connecticut, Delaware, Illinois, Maryland, Massachusetts, Rhode Island, New Jersey, Virginia, New York, New Mexico, Washington DC, District of Columbia, Colorado, New Hampshire, California, Oregon, Washington, Minnesota, Hawaii.
Taasisussat pingaaruteqartut
Naalagaaffinni aalajangersimasumik taasissussat katillutik 538-upput. Taakkua USA-p naalagaaffiini 50-ini agguataaqqapput.
Naalagaaffiit tamarmik immikkut aalajangersimasumik amerlassusilinnik taasissussaqartarput, taamaammat naalagaaffiit amerlanerpaanik taasisussallit pingaaruteqartupilussuusinnaapput. Præsidentip illorsuani allaffeqalersinnaajumalluni taasisussanit amerlanerussuteqartunit tassa 270-init taaneqarsimasariaqarpoq.
Naalagaaffiit præsidentinngorniuttunik taasisussaminnik namminneq toqqaasarput.
Taamaammat præsidentinngorniuttuni taaguunneqarnerpaaq toqqaannaartumik præsidentinngortitaasanngilaq. Præsidentinngorniussimasunimi tallimat taaguunneqarnerpaagaluarlutik præsidentinngornikuunngillat. Hillary Clinton Donald Trumpimut 2016-imi ajorsarmat kingullermik taama pisoqarpoq.
Hillary Clintonimi Donald Trumpimut sanilliulluni 2,8 millioninit amerlanerusunit taamanikkut taaguunneqarnerugaluarpoq.
