Politikki

Kiffartuussinissamik isumaqatigiissutit akuersissutigineqarput

Ilaasunik, nassiussanik allakkanillu Kalaallit Nunaata iluani assartuussineq pillugu kiffartuunneqarnissamut isumaqatigiissutit sivitsorneqarnissaat Naalakkersuisut akuersissutigaat

Allattoq Ivik Kristiansen, Inge S. Rasmussen

oktobarip 31-at 2015 15:23

Taamaasillunilu avinngarusimanerusunut 2016-imi angalaniarluni, umiarsuarnissamut timmisartornissamullu billetinik pisisoqarsinnaanngussaaq.

Attaveqarnermut naalakkersuisoq, Knud Kristiansen, arfininngornermi taama paasissutissiivoq.

Aamma atuaruk Juullisioriarnissaq qulakkeerneqarpoq uternissarli qulakkeerneqarsinnaanani

Billetinik inniminiisoqarsinnaannginngera pillugu angalanianit sullissisuniillu isornartorsiuisoqartoq, KNR-mit sapaatip akunnerata ingerlanerani oqaluttuarineqarpoq.

Aamma atuaruk Kiffartussinissamik isumaqatigiissutip naammassineqannginnera ulapititsivoq

Angallassinermili sullissisut maanna billetinik tuniniaasinnaanngortut, Knud Kristiansen oqarpoq.

- Tassunga tunngatillugu nuannaarutigaara kiffartuussineq qaffasissoq attatiinnarneqarsinnaammat, naak massa aningaasatigut tunngavissat sukannersuugaluartut, Knud Kristiansen oqarpoq.

Kiffartuussinermut isumaqatigiissutit ukiumik ataatsimik sivitsorneqassapput, piffissallu taassuma ingerlanerani kiffartuussinermik isumaqatigiissutit nutaat 1. Januar 2017-miit atuutilertussat isumaqatigiinniutigineqassallutik.

Naalakkersuisut naatsorsuutigaat, kiffartuussinermut isumaqatigiissutit nutaat 2016-mi aasaanerani sulinngiffeqalinnginnermi naammassineqareerumaartut.

Aamma atuaruk Arctic Umiaq Linep Namminersorlutik Oqartussanik atsioqateqarnissani suli utaqqivaa

Aamma atuaruk Juullikkunni angallannissaq qulakkeerneqarpasittoq