Juullisioriarnissaq qulakkeerneqarpoq uternissarli qulakkeerneqarsinnaanani
![](/sites/default/files/styles/image_934x467/public/article_images/helikopter_foto_branding_greenland_630.jpg?itok=M_r_6qiZ)
Silaannakkut umiarsuartigullu angallannikkut kiffartuussinissamik isumaqatigiissutit ukiunut tulliuttunut atuuttussat naammassineqannginnerat pissutigalugu timmisartortitseqatigiiffimmut Air Greenlandimut ukiortaamiit ilaaniartut inniminniisinnaanngillat.
Juullisioriarlutik angalanissamut inniminniisut, ukiortaamit uternissamut inniminniisinnanngitsut ilagaat John Pedersenip pania Ilulissani atuartoq, Qasigiannguani juullisioreerpat Ilulissanut uternissaanut innimiisinnaanngillat.
John Pedersenip paniata Ilulissani atuarnera januaarip sisamaanni allarteqittussaavoq maannakkullu uternissaa qulakkeerneqarsinnanngilaq, timmisartuutileqatigiiffimmut Air Greenlandimut inniminniisoqarsinnaanngimmat.
- Uternissaa aalajangiissuulluinnartuuvoq, John Pedersen KNR-imut oqarpoq.
Aamma atuaruk Kiffartussinissamik isumaqatigiissutip naammassineqannginnera ulapititsivoq
Namminersorlutik Oqartussanik isumaqatiginniarnerit piffissami qanittumi naammassineqarnissaat Air Greenlandimit neriuutigineqarpoq.
- Isumaqatigiinniarnerit soorunami ataqqissavavut, pisortaqarfillu maannakkuuugallartoq isumaqatigiinniarpugut aamma isumaqatigiinniarnerit ajunngitsumik ingerlapput, neriunnarlutillu aamma piffissap sivisunngitsup iluani aaqqissinnnaassavagut, pisisartugut ajunngitsumik sullikkumallugit, Air Greenlandimi sulisoqarnermut pisortaq, Mads B. Christensen, taama KNR-imut oqarpoq.
Kiffartuussinissamik isumaqatigiissuteqarnermi sumiiffinni avinngarusimanerusumiittuni innutaasut angalasinnaanissaat Naalakkersuisunit qulakkeerneqartarpoq.
Aamma atuaruk Isorliunerusuni jullisioriareeruit angerlarnaveersinnaavutit
Timmisartuutileqatigiiffiit sumiiffinni aalajangersimasuni iluanaarutaaffiunngitsuni timmisartuussinissaannik Namminersorlutik Oqartussanit akilerneqartarput.
Kiffartuussinissamut isumaqatigiissutit naammassineqarsimannginerat pissutigalugu ukiumi tulliuttumi angalanissamut Air Greenlandimut inniminiisoqarsinnaanngilaq.
- Taannarpiaq pissutigalugu aappaagumut suna malissanerlutigu nalugatsigu soorlu assersuutigalugu billetsit tuniniarsinnaanerigut naluagut, Mads B. Christensen oqarpoq.
Timmisartuutileqatigiiffimmi Air Greenlandimi ukiup tulliani angalaniartut inniminniisinnaannginerat kikkunut tamanut eqquivoq, John Pedersen oqarpoq.
Ineqarnermut Attaveqarnermullu Naalakkersuisoq Knud Kristiansen kiffartuussinissamut isumaqatigiissutit atsiorneqartinnagit tusagassiorfinnut oqaaseqarniannginngitsoq, naalakkersuisup allattaa Jensine Berthelsen KNR-mut oqarpoq.