Kiffartussinissamik isumaqatigiissutip naammassineqannginnera ulapititsivoq
Ilaasortaatinik umiarsuaatileqatigiiffik Artic Umiaq Line ukiortaap kingorna nunaqarfiit ilaannut angalaniartunit saaffigineqartarpoq, taakkuali ilaanissamut inniminniisinnaanngillat
- Arctic Umiaq Line-mip umiarsuaannut ilaaniartut siarnguttarput paasiniarlugu sumut killinnersugut , qaqugu inniminniisoqarsinnaanersut paasiniarlugu, kisianni ajoraluartumik akisinnaanngilagut kiffartussiinissamik isumaqatigiissummik atsiogaqarsimatinnata Arctic Umiaq Line-mi pisortaq Jette Larsen oqarpoq.
Aamma atuaruk Juullikkunni angallannissaq qulakkeerneqarpasittoq
Kiffartuussinissamik isumaqatigiissutit ukiumut tulliuttumut atuuttussat atsiorneqannginerat pissutigalugu Arctic Umiaq Line ukiortaamiit angallassinissanut pilersaarusiorsinnaanngilaq, tamannalu pisortap naammaaginartinngilaa.
Namminersorlutik Oqartussat kiffartuussinissamik isumaqatigiissutit ukiuni kingullerni aaqqiissutaaginnarallartarput,soorlu aamma ukioq kingulleq isumaqatigiissutit ukiumik ataatsimik sivitsorneqartartut.
- Ukiut arlallit taamatut ingerlanikuuvoq ajoraluartumik, soorunami tamanna uagutsinnut naammaginanngilaq aamma angalaniartunut naammaginarani, Arctic Umiaq Linemi pisortaq Jette Larsen oqarpoq.
Kiffartuussinissamik isumaqatigiissutip naammassineqannginera umiarsuaatileqatigiiffimmut taakkualu sullitaannut piffissamik atuisitsivoq.
- Arctic Umiaq Linemut ullumikkut saaffiginnittartut eqqarsaatigalugit taakkununnga piffissaajaataasarput aamma uagutsinnut, Jette Larsen oqarpoq.
Nunaqarfiinnut Sisimiut aamma Maniitsup pigissaanniittunut kiisalu Kapisillinnut ukiortaamiit angalaniartut kiffartuussinissamik isumaqatigiissut atsiorneqartinnagu inniminniisinnaanngillat.
Aamma atuaruk Isorliunerusuni jullisioriareeruit angerlarnaveersinnaavutit
Sanaartornermut Attaveqarnermullu Naalakkersuisoq Knud Kristiansen septemberip ulluisa qulingani tusagassiutinut nalunaaruteqarluni neriorsuivoq, - piffissap sivikitsuinnaap ingerlanerani sivitsuinissamut atugassarititaasut ersarissarneqassapput taamaalilluni kikkut tamarmik juullip nalaani angalanissaminnut pilersaarusiorsinnaaleqqinissaat bilitsisinnaalernissaallu qularissanngilaat, Naalakkersuisoq Knud Kristiansen allappoq.
Attaveqarnermut Naalakkersuisoq Knud Kristiansen kiffartuussinissamut isumaqatigiissut pillugu radioaaviisimit oqaaseqartinniarneqaraluarpoq tamannali iluatsissinnaasimanngilaq.
