Isorliunerusuni jullisioriareeruit angerlarnaveersinnaavutit

Isorliunerusunut timmisartumik angallassinerit kiffartuussinerillu, Air Greenlandip Namminersorlutillu Oqartussat akornanni isumaqatigiissutaasussat suli atsiorneqannginneri pissutigalugit, ilaquttat juullisioriarniarlutik pilersaaruteqartut ukioq manna aallanngitsoorsinnaapput.

Allattoq Apollo Jeremiassen

septembarip 07-at 2015 13:59

Sermitsiaq.AG ullumi taama allaaserisaqarpoq.

Isorliunerusunut kiffartuussinissat assigiinngitsut aqqaniliusut, sulili tassa atsiorneqanngitsut ilagaat ilaasunik angallassinerit, allakkanik assartuussinerit taamatullu atortussanik assigiinngitsunik assartuussinerit.

Isorliunerusunut kiffartuussinissanik isumaqatigiinniarnerit aasaq sulinngiffeqareernerup kingorna aallartikkaluarput. Tamassumali suli naammassineqannginnerata pilersippaa, angalaniarlutik saaffiginnittut erseqqarissumik Air Greenlandimiit suli akineqarsinnaannginneri.

- Isorliunerusunut jullisioriarniarnianit arlalinnit saaffigineqartalereerpugut, ajoraluartumilli taakku erseqqarissumik akisinnaaneq ajorpagut, juullisioriareerunik qaqugu utersinnaanissaannik, Air Greenlandip pisortaanera, Michael Højgaard Sermitsiaq.AG-mut oqarpoq aamma oqarluni neriulluni isumaqatigiinniarnerit qanittukkut naammassineqarumaartut.

Aamma atuaruk Kiffartuussinissamut isumaqatigiissut unittoortitsisoq

Kiffartuussinissamik isumaqatigiissutit aqqanillit suli atsiorneqanngitsut

Isorliunerusunut kiffartuussinerit assigiinngitsut aqqanillit isumaqatigiinniutigineqartarput, taakkuninnga kiffartuussinerit imminut akilersinnaaneri annikikkaagata, tassalu Oqartussanit taakku tapiiffigineqartarlutik.

Isumaqatigiissutissat suli atsiorneqanngimmata, januaarip aallaqqaataaniit pilersaarutit timmisartumullu ilaanermi akigitinneqartussat, Air Greenlandimit suli aalajangerneqanngillat, Sermitsiaq.AG allappoq.