Juullikkunni angallannissaq qulakkeerneqarpasittoq
![](/sites/default/files/styles/image_934x467/public/article_images/bell_212_0_0.jpg?itok=555Xoymv)
Ataatsimiititaliap isumaqatigiissup kiffartuussinissamik isumaqatigiissutit ukiumik ataatsimik sivitsorneqarnissaat akuersissutigaat, Inatsisartunit tusagassiorfinnut tamanna nalunaarutigineqarpoq.
Aningaasaqarnermut ataatsimiititaliap akuersissuteqarnera Naalakkersuisunut aamma mianersoqqussutitaqarpoq, taakkumi nunatsinni angalasunik nassiussanillu siunissami isumaqatigiissuteqarnissamut ukioq ataaseq maanna periarfissarilerpaat.
AAMMA ATUARUK Isorliunerusuni jullisioriareeruit angerlarnaveersinnaavutit
Naalakkersuisulli ingerlatseqatigiiffiit kiffartuussinissamik nutaanik isumaqatigiissuteqarfiginissaannik isumaqatigiinniarnerisa kinguartinneqarnissaanik tamanna isumaqanngilaq.
- Ataatsimiititaliap isumaa tunngavigalugu Naalakkersuisut suliamik aallartitsinissaminnut aappaagumut utaqqisariaqanngillat, Aningaasaqarnermut ataatsimiititaliaq taama allappoq, aamma ataatsimiititaliap qaammatip matuma ingerlanerani kingusinnerusukkut suliaq pillugu Naalakkersuisunik oqaloqateqarnissani pilersaarutiginerarpaa.
Innuttaasut ingerlatsisullu piffissaalluartillugu angalanissamut pilersaarusiorsinnaannginnertik pillugu pakatseqqittut ataatsimiititaliap maluginngitsoorsimannginnerarpaa.