Arctic Umiaq Linep Namminersorlutik Oqartussanik atsioqateqarnissani suli utaqqivaa

Nunatsinni nunaqarfinnik illoqarfinnillu avinngarusimasunik kiffartuussinissamut atatillugu, Air Greenlandip Namminersorlutillu Oqartussat isumaqatigiissutaasa utaqqisaanera, Air Greenlandimit kisimi utaqqineqanngilaq aamma Arctic Umiaq Linemit utaqqineqarpoq.

Allattoq Apollo Jeremiassen

septembarip 07-at 2015 18:27

- Tassa sullitagut nunaqarfinnut Nunatta qeqqaniittunut juullisioriarnissamik pilersaaruteqartut allatulli nalornissuteqarput ukiortaap kingorna angerlarnissartik pillugu, Arctic Umiaq Linep pisortaa, Jette Larsen taama oqarpoq.

Ilaasuinnaagitsulli nalornissuteqarput aamma Arctic Umiaq Linemik sullissisut, ilaatigut Nunatta qeqqani nunaqarfinnut angallannernik kiffartuussisut aamma nalornisinneqarput.

Aamma atuaruk Isorliunerusuni jullisioriareeruit angerlarnaveersinnaavutit

- Tassa soorunami Namminersorlutik Oqartussanut isumaqatigiissusiornissarput piffissami qanittumi pingaaruteqarluinnarpoq, tassami inuit namminersorlutik angallataatillit aamma ukiup tulliani uagutsinnut kiffartuussinissaat aningaasarsiornissaallu eqqarsaatigalugit, Arctic Umiaq Linep pisortaa, Jette Larsen taama oqarpoq.

Isumaqatigiissutilli kinguarsarneqarnera Arctic Umiaq Linep aningaasaqarneranut sunniuteqarnavianngitsoq, Jette Larsen KNR-imut oqarpoq, tassa Arctic Umiaq Linep amigartooruteqarluni ilaasunik angallassisarnera Namminersorlutik Oqartussanit matussuserneqarluni tapiiffigineqartarmat.