Kielsenimik Siumumillu qinersisut qinersinerni kingullerni sisamani ikiliartortut
Kim Kielsen naalakkersuisut siulittaasuattut marlunngormat qinersinerup kingorna ingerlaqqissinnaasutut inissippoq, tamanna pivoq naak Siumut kingullermi qinersinermut naleqqiullugu kinguariaateqaraluartoq.
Ukiunilu kingullerni sisamani pissutsit taamaassimapput. Tassa Inatsisartunut Folketingimmullu 2014-imi qinersinerit, kommuninullu 2017-imi qinersineq, Inatsisartunullu marlunngormat qinersineq.
Inatsisartunut 2014-imi aallartippoq. Aleqa Hammondip Siumumi siulittaasuujunnaarnerata, taamalu naalakkersuisunut siulittaasuujunnaarnerata kingorna aallartilluni.
AAMMA ATUARUK Ilisarnartorpassuit qinersisartunit soraarsinneqartut
Siumumik 2014-imi qinersisoqarnerani 2013-imut naleqqiullugu qinersisut 2802-nik ikinnerupput, procentinngorlugu 8,6 procentpointinik ikinnerusunik taasiseqarluni.
Folketingimut 2015-imi qinersisoqarmat, Siumumik taasisut tamatumuuna 520-nik ikilipput, kingullermilli Folketingimut qinersinermut sanilliullugu qinersiartortut ikinnerummata Siumut procentinngorlugit 2015-imi amerlanerupput.
Kommuninut 2017-imi qinersisoqarmat Siumut 929-nik ikinnerusunik taava qinerneqarpoq, 6 procentpointinik taasisikinnerulluni.
AAMMA ATUARUK Kielsen qinersisartunik annaasaqaraluarluni qinersinermi ajugaavoq
Kingullermi marlunngornermi qinersisoqarmat. Siumup naalakkersuisuutitaqarnini attappaa, taasisuisali ikileriangaatsiarlutik. 2014-imut naleqqiullugu Siumumik taasisut 2151-inik ikileriarput. Kim Kielsenip taamanikkut qinersinermut sanilliullugu ikinnerungaatsiartunit taaguunneqarnera ilaatigut pissutaavoq.
Qinersinerit kingulliit marluk eqqarsaatigalugit Siumumik taasisut 2013-imi qinersinermut naleqqiullugu katillugit 4953-inik ikinnerulersimasut takuneqarsinnaavoq.
AAMMA ATUARUK Partiinut tamanut ammavunga
