Meeqqanut inuusuttunullu naalakkersuisup Aqqaluaq B. Egedep sakissamigut qilernermik sungaartumik saqqarmiulerluni politikerip suliniaqatigiinneq "Yellow September" peqataaffigalugu ersersippaa. "Yellow september" tassaavoq imminut toquttarneq pinaveersaartinniarlugu suliniut.

Taannaavorlu tusagassiorfinnik katersortitsinermini Aqqaluaq B. Egedep sammisaa.

Imminut toqunnissaq pinaveersaartinniarlugu oqaasii ersaripput.

-  illit tusarnaartoq aamma akisussaaqataaffigivat, Aqqaluaq B. Egede oqarpoq. 

Innuttaasut akisussaaffimmik tigusinissamut kaammattuinerata saniatigut nutaarsiassaqarpallaanngilaq.

Naalakkersuisut suliniutaat amerlagisassaanngillat  

Naalakkersuisut "QAMANI Imminut toqunnissamik pinaveersaartitsineq pillugu periusissiaq 2023-2028” ukioq manna saqqummiuppaat.

Periuusissiaq QAMANI saqqummeqqammermat suli suliniutit timitalerneqanngitsut Aqqaluaq B. Egedep oqaluttarfimmiit oqaatigaa.

- Naammassisarput siulleq tassaavoq pilersaarut qanoq iliuusissanik pilersaarutaasoq, tullinnguuppoq taakkua innuttaasunik akuutitsiniarluta aaliangeratta, qanutut aaqqissuussaanissaanik suliaqarnissarput, Aqqaluaq B. Egede oqarpoq.

Tusagassiortunik katersortitsinermi Tusaanngami kisitsisit qanoq isikkoqarnersut aamma tusagassiortunut agguaanneqarput.

Tusaanngaminngaanneersut kisitsisit, Tusaannga tassaavoq meeqqanut inuusuttunut inersimasunullu oqaloqateqarusuttunnik saaffissaq.

Kisitsisit takugaanni, maluginiassat marluupput.

Siullertut, innuppassuaqarpoq ajornartorsiutinnik qaangiinissaminnik sapersartunik.

Aappaattut Tusaannga inuppassuarnik atorluarneqartoq takuneqarsinnaavoq.

2021-mi saaffiginnittut 2.582-miit ukioq mannamut 4.876-pput. Taakkunani 10 procentii imminut toqunnissamik eqqarsaatilinnik saaffiginnissuteqarsimallutik.

Taamaakkaluartoq imminut toquttut ukiumut 40-sut, ukiuni siuliinit nikinganeqanngilaq.

Taamaammat Aqqaluaq B. Egede imminut toqunnissamut akiuiniarneq pillugu naalakkersuisut suliaat naammaginarnersoq aperineqarami ima akivoq:

- Ataasiinnarluunniit imminornikkut annaasimagutsigu, iluanngilaq.

Paqumisunneq ajoqutaavoq

Tusagassiortuni katersortisinermi naalakkersuisoq arlaleriarluni inuit aqqusaakkaminnik misigissutsikkut anersaakkullu ammanerunissaannik kaammattuuteqarpoq.

Sapiissuseqartoqartariaqartoq nassuerutigaa, pisariaqartorli aamma oqaatigalugu.

- Ammanerusumik inooriaasitta nalilersornissaanut ammanerusumik, imigassartoriaasitta inuunerluuteqarniotta tamaasa ataatsimut oqallisiginissaanut ammanerusariaqarpugut. Aqqaluaq B. Egede taama oqarpoq.