Ilisarnartorpassuit qinersisartunit soraarsinneqartut
Nuummi Inatsisartut ataatsimiittarfianni allaffeqarfimmilu aappaluttumi aqqit allattorsimaffii taarserarneqangaatsiassapput. Qinersinissaq nalunaarutigineqarmat ilaasortanit 31-usunit affangajaat 14-it qinigaaqqinngitsoorput. Taakku saniatigut Peqqissutsimut Naalakkersuisoq Agathe Fontain qinigaaqqinngitsoorpoq.
Taakku saniatigut inatsisartunut ilaasortaasimasut tallimat qineqqusaaqqinngitsoorput.
AAMMA ATUARUK Aajukua Inatsiartuni ilaasortanngortut
Partiini angisuuni taarsersuineq annertusimavoq. Siumut sinnerlugu Inatsisartunut ilaasortaasimasut qulit ukiuni tulliuttuni sisamani naatsorsuutigissanngilaat Inatsisartuniileqqinnissartik.
Taakkununnga ilaallutik partiip politikkikkut oqaaseqartartua Jess Svane, Atassummiillu Siumumut nuunnerit Knud Kristiansen aamma Mala Høy Kuko.
Taakku saniatigut ilaatigut Suka K. Frederiksen aamma Lars-Emil Johansen qinigassanngorteqqinngillat.
Aamma Inuit Ataqatigiit Inatsisartuni ilaasortaatitariligaat qinersinerup kingorna allanngorluinnarput. IA-rmiut arfinillit qinigaaqqinngillat, partiip politikkikkut oqaaseqartartua Bendt B. Kristiansen aamma peqqissutsimut Naalakkersuisoq Agathe Fontain.
AAMMA ATUARUK Kielsen qinersisartunik annaasaqaraluarluni qinersinermi ajugaavoq
Taakku saniatigut Aaja Chemnitz Larsen qinigassanngorteqqinngilaq.
Aamma Partii Naleqqap Inatsisartuniititani marluk inuulluaqqusariaqarpai, Anton Frederiksen aamma Per Rosing-Petersen. Suleqatigiissititsisuneersoq Michael Rosing partiimik aallartitseqatiminit Tillie Martinussenimit ajugaaffigineqarpoq. Ataasiinnarmik isertitsigamik Michael Rosing Inatsisartuniikkunnaarpoq.
Qinigassanngortissimasulli pakatsisut inatsisartut ataatsimiittarfianni issiavinnut amernik qallikkani issiaqqissinnaanissaminnut ukiut sisamat ingerlaneranni suli periarfissaqarput.
Qaquguussanerpormi naalakkersuisunngortitsisoqarpat ilaasortat nutaat sulinngiffeqartariaqalerpata, ilaasortanut issiavinnut pilerigineqaqisunut anngutinngitsoortunut inissaqalissaaq.
Qinigaaqqinngittut qinigassanngorteqqinngittullu ataani allassimapput:
Inatsisartut 2014-2018
Ineqi Kielsen, Siumut
Jens Immanuelsen, Siumut
Jess Svane, Siumut
Knud Kristiansen, Siumut
Mala Høy Kuko, Siumut
Nikkulaat Jeremiassen, Siumut
Bendt B. Kristiansen, Inuit Ataqatigiit
Debora Kleist, Inuit Ataqatigiit
Hans Aronsen, Inuit Ataqatigiit
Kelly Berthelsen, Inuit Ataqatigiit
Villy Olsvig, Inuit Ataqatigiit
Anthon Frederiksen, Partii Naleraq
Per-Rosing Petersen, Partii Naleraq
Michael Rosing, Samarbejdspartiet
Naalakkersuisut
Agathe Fontain, Inuit Ataqatigiit
Qinigassanngorteqqinngittut:
Jens-Erik Kierkegaard, Siumut
Lars-Emil Johansen, Siumut
Martha Lund Olsen, Siumut
Suka K. Frederiksen, Siumut
Aaja Chemnitz Larsen, Inuit Ataqatigiit
