Kielsen tuaviuuteqanngilaq
Nunatsinni politikkikkut kikkut aquttuussanersut innuttaasut ullut arfinillit matuma siorna aalajangerpaat. Naalakkersuisoqatigiiliornissarlu maanna tullinnguuppoq, Siumulli siulittaasuata isumaqatiginninniarnerit eqqissiivilluni ingerlanniarnerarpai.
- Sapaatit akunneri arfinillit periarfissarivagut. Tassa eqqissilluta suliassaq ingerlaterujoorparput, Kim Kielsen Nunatta Nipaani ullaaq apersorneqarluni oqarpoq, partiillu tamaasa marloriarlugit naapereersimanerarpai.
Isumaqatiginninniarnermilu qineqqusaarutaasimasut salliutinneqassanerarpai.
AAMMA ATUARUK Aajuku qinersisoqarnerani qinigaanerpaat qulit
- Isumaginninnerup, sanaartornerup iluani, ilinniartitaanermut, utoqqarnut, inuusuttut, meeqqanullu tunngasut, tassa tamaaviisa qineqqusaarnerup nalaani eqqartornikuusatsinnit tigooqqaasaqattaarpugut. Tassa partiit allat aamma taamaaliorput.
Partiillumi allat isumaqatiginninniarnermi piumasaqaatikinngillat. Demokraatit siulittaasuata Randi Vestergaard Evaldsenip partiimi pingaartitai angorusunnerarpai.
- Akileraarutitigut oqilisaassinissaq pisariaqartutut isigivarput, ingerlatseqatigiiffinnut akileraarut aamma appartinneqarnissaa sulissutigivarput. Aammalu isumaginninnerup iluani aaqqissuusseqqinnissat pisariaqarluinnartutut isigisagut aamma qallorpagut, taakkualu saniatigut aamma assigiinngitsorpassuarnik aamma anguniagaqarpugut, Randi Vestergaard Evaldsen oqarpoq.
AAMMA ATUARUK Imaaliornikkut Naalakkersuisoqatigiilertoqassaaq
Illuatungerluinnaanilli Inuit Ataqatigiit siulittaasuata isumaqatiginniarnermi kaffisoqatigiittarnerni eqqartorneqartut oqaatigerusunngilai.
- Taakkua imarisai oqaaseqarfigerusunngilakka, isumaqatiginninniarnerit tusagassiorfitsigut ingerlakkusunnginnatsigit, Sara Olsvig oqarpoq, nangipporlu:
- Aamma takutissimavarput illuatungiliuuttuulluta aamma naalakkersuisooqataalluta angusarissaartarsinnaalluta. Illuatungiliuuttuugaangatta aamma siunnersuuterpassuavut Inatsisartutigut iluatsittarpagut sunniuteqartitsilluartarlutalu, Sara Olsvig oqarpoq.
AAMMA ATUARUK Qinersinerit ima kisinneqassapput
AAMMA ATUARUK Qineqqusaarneq pikkunarsimavoq
